ജനങ്ങളുമായി നിരന്തര ബന്ധത്തിലൂടെ സഹകരണം ഉറപ്പാക്കും -ഗവര്‍ണര്‍

മനാമ: ജനങ്ങളുമായി നിരന്തര ബന്ധത്തിലൂടെ വിവിധ വിഷയങ്ങളില്‍ അവരുടെ സഹകരണം ഉറപ്പാക്കാന്‍ സാധിക്കുമെന്ന് ദക്ഷിണ മേഖല ഗവര്‍ണര്‍ ശൈഖ് ഖലീഫ ബിന്‍ അലി ബിന്‍ ഖലീഫ ആല്‍ ഖലീഫ വ്യക്തമാക്കി. ഗവര്‍ണറേറ്റില്‍ പ്രദേശത്തെ പൗരപ്രമുഖരെ സ്വീകരിച്ച് സ്വീകരിക്കുകയായിരുന്നു അദ്ദേഹം. ജനങ്ങളുമായി ശക്തമായ ബന്ധം സ്ഥാപിക്കുന്നതില്‍ ഭരണാധികാരികള്‍ കാണിക്കുന്ന മാതൃക ഹൃദ്യമായതാണ്.

എല്ലാ ആഴ്​ചയിലും നടക്കുന്ന മജ്​ലിസില്‍ പ്രദേശവാസികളുമായി കൂടിക്കാഴ്ച്ച നടത്താനും അവരുടെ പ്രശ്നങ്ങള്‍ മനസ്സിലാക്കി പരിഹാരം കാണാനുമാണ് താന്‍ ശ്രമിക്കുന്നതെന്നും അദ്ദേഹം പറഞ്ഞു. നേരിട്ട് കാര്യങ്ങള്‍ പറയാനും സംവദിക്കാനും അവസരം ലഭിക്കുന്നത് ജനങ്ങളില്‍ പ്രതീക്ഷയുണര്‍ത്തുമെന്നും അദ്ദേഹം ചൂണ്ടിക്കാട്ടി. ജനങ്ങളുടെ പരാതികളിലും ആവലാതികളും തീര്‍പ്പ് കല്‍പിക്കാനും കൂടുതല്‍ കാര്യക്ഷമമായി പ്രവര്‍ത്തിക്കുമെന്നും ഗവര്‍ണര്‍ കൂട്ടിച്ചേര്‍ത്തു.