റാംലി മാൾ കാർഷിക വിപണിയിൽ നിരവധി പേരെത്തി

മനാമ: ബഹ്​റൈനിൽ പ്രാദേശികമായി വിളവെടുത്ത പഴങ്ങളും പച്ചക്കറികളും ഉൾപ്പെടുത്തി റാംലി മാളിൽ ഒരുക്കിയ കാർഷിക വിപണി വൻ വിജയമായി. ശനിയാഴ്​ച നടന്ന വിപണിയിൽ 2,000ത്തിലധം പേരെത്തി. ‘ബഹ്​റൈൻ ഫാർമേഴ്​സ്​ മാർക്കറ്റും’ ‘ഡയറക്​ടറേറ്റ്​ ഒാഫ്​ അഗ്രികൾചർ ആൻറ്​ മറൈൻ റിസോഴ്​സസു’മായി സഹകരിച്ചാണ്​ വിപണി നടത്തിയത്​. ചെറിയ തക്കാളി, മുളക്​, കക്കരിക്ക, ബെറി ഇനത്തിൽ വരുന്ന പഴങ്ങൾ, ഇലക്കറികൾ തുടങ്ങിയവയാണ്​ വിൽപനക്കെത്തിയത്​.ആട്ടിൻപാൽ, ചീസ്, മോര്​, മുട്ട, കൂൺ തുടങ്ങിയവയും വിൽപനക്കായി എത്തിയിരുന്നു. പരിപാടി വിജയകരമായി നടത്താൻ എല്ലാ പിന്തുണയും നൽകിയ അധികൃതർക്ക്​ ലുലു റീജനൽ ഡയറക്​ടർ ജൂസർ രൂപവാല നന്ദി അറിയിച്ചു. ചെടികളുടെ വിൽപനയും ലഘുഭക്ഷണശാലകളും സജ്ജീകരിച്ചിരുന്നു. വെജിറ്റബിൾ കാർവിങ്​ വിദ്യ മനസിലാക്കാനായി പ്രത്യേക സ്​റ്റാളും ഒരുക്കി. ഇത്​ നിരവധി പേർ ഉപയോഗപ്പെടുത്തി.