പാർപ്പിട പദ്ധതി നടപ്പാക്കാനുള്ള ഇസ്രായേൽ നീക്കത്തിനെതിരെ പ്രതിഷേധം

മനാമ: ഫലസ്​തീനിലെ പടിഞ്ഞാറേക്കരയിൽ പാർപ്പിട പദ്ധതി നടപ്പാക്കാനുള്ള ഇസ്രാ​യേൽ നീക്കത്തിനെതിരെ ബഹ്​റൈൻ ശക്തമായി പ്രതിഷേധിച്ചു. അന്താരാഷ്​ട്ര നിയമങ്ങളുടെ ലംഘനവും മേഖലയിൽ കൂടുതൽ അശാന്തി വിതക്കാൻ കാരണമാവുകയും ചെയ്യുന്ന തീരുമാനമാണിത്​. ഫലസ്​തീൻ ജനതയുടെ അവകാശങ്ങൾ ഹനിക്കുന്നത്​ ഒരു നിലക്കും അംഗീകരിക്കാൻ സാധ്യമല്ല.

നിലവിൽ യുദ്ധം കൊണ്ട്​ പൊറുതിമുട്ടിയ ജനതയെ വീണ്ടും വീണ്ടും മുറിവേൽപിക്കാനുള്ള ശ്രമമാണിതെന്നും അതിനാൽ ഇത്തരം നീക്കങ്ങളിൽ നിന്നും പിന്മാറേണ്ടത്​ അനിവാര്യമാണെന്നും വിദേശകാര്യ മന്ത്രാലയം ഇറക്കിയ പ്രതിഷേധക്കുറിപ്പിൽ ആവശ്യപ്പെട്ടു. 1967ൽ അംഗീകരിച്ച അതിർത്തി മാനിച്ച്​ ദ്വിരാഷ്​ട്ര ഫോർമുലസ്വീകരിക്കാനും അതുവഴി മേഖലയിൽ ശാശ്വത സമാധാനം സാധ്യമാക്കാനും കഴിയണമെന്നും പ്രസ്​താവനയിൽ തുടർന്നു.