ബഹ്‌റൈന്‍-തായ്‌ലൻറ്​ സഹകരണം: സംയുക്ത സമിതി പ്രവര്‍ത്തനം നിർണായകം –പ്രധാനമന്ത്രി

മനാമ:ബഹ്‌റൈന്‍^തായ്‌ലൻറ്​ സംയുക്ത സമിതി പ്രവര്‍ത്തനം ഇരുരാജ്യങ്ങളും തമ്മിലുള്ള ബന്ധം ദൃഢമാക്കുന്നതില്‍ സുപ്രധാന പങ്ക് വഹിക്കുന്നതായി പ്രധാനമന്ത്രി പ്രിന്‍സ് ഖലീഫ ബിന്‍ സല്‍മാന്‍ ആല്‍ഖലീഫ വ്യക്തമാക്കി. കഴിഞ്ഞ ദിവസം ബാങ്കോക്കില്‍ തായ് പ്രധാനമന്ത്രി ജനറല്‍ പ്രയുത്​ ചാൻ ഒാചയുമായി നടത്തിയ കൂടിക്കാഴ്​ചയില്‍ സംസാരിക്കുകയായിരുന്നു അദ്ദേഹം. ഇരുരാജ്യങ്ങളും തമ്മിലുള്ള ബന്ധം ശക്തമാക്കുന്നതിനും സഹകരണം വ്യാപിപ്പിക്കുന്നതിനുമുള്ള ചര്‍ച്ചകള്‍ നടന്നു. ആസിയാന്‍ രാഷ്​ട്രങ്ങള്‍ തമ്മിലുള്ള ബന്ധം മെച്ചപ്പെടുത്തുന്നതിനായി ഒരുമിച്ച് പ്രവര്‍ത്തിക്കുന്നതിനുള്ള മാര്‍ഗങ്ങളും ഇരുവരും വിലയിരുത്തി. മേഖലയിലെ വിവിധ പ്രശ്‌നങ്ങളും അതില്‍ സ്വീകരിക്കുന്ന നിലപാടുകളും ചര്‍ച്ചയായി. വിവിധ നിക്ഷേപ പദ്ധതികളില്‍ സഹകരിക്കുക വഴി സാമ്പത്തിക മേഖലയില്‍ ഇരുരാജ്യങ്ങളും ശക്തി പ്രാപിക്കും. ഭക്ഷ്യസുരക്ഷയുമായി ബന്ധപ്പെട്ട പദ്ധതികളില്‍ തായ്‌ലൻറുമായി അടുത്ത ബന്ധമാണുള്ളത്​.  അത് ബഹ്‌റൈന് ഗുണകരമായിട്ടുണ്ടെന്നും പ്രധാനമന്ത്രി കൂട്ടിച്ചേര്‍ത്തു.