പ്രധാനമന്ത്രി ഇടപെട്ടു; നിർമാണ കമ്പനിയിൽ ശമ്പളം മുടങ്ങിയ പ്രശ്​നത്തിന്​ പരിഹാരമായേക്കും

മനാമ: നിർമാണ​ മേഖലയിലെ പ്രമുഖ കമ്പനിയിൽ മാസങ്ങളായി ശമ്പളം മുടങ്ങിയ പ്രശ്​നം തീർക്കാൻ തൊഴിൽ, സാമൂഹിക വികസന മന്ത്രാലയം നടപടി സ്വീകരിക്കണമെന്ന്​ പ്രധാനമന്ത്രി പ്രിൻസ്​ ഖലീഫ ബിൻ സൽമാൻ ആൽ ഖലീഫ ഉത്തരവിട്ടു. തൊഴിലാളികളുടെ മുടങ്ങിയ ശമ്പള കുടിശ്ശിക ഉടൻ ലഭ്യമാക്കാൻ വേണ്ട നടപടി സ്വീകരിക്കണം. തൊഴിലാളികളുടെ അവകാശങ്ങൾ സംരക്ഷിക്കാൻ സർക്കാർ പ്രതിജ്​ഞാബദ്ധമാണ്​. തൊഴിലാളികളുടെയും തൊഴിലുടമകളുടെയും താൽപര്യങ്ങൾ ഒരുപോലെ പരിഗണിക്കുന്ന നയമാണ്​ സർക്കാർ സ്വീകരിക്കുന്നത്​. രാജ്യത്തെ നിയമം അനുസരിച്ച്​ തൊഴിലാളികൾക്ക്​ ശമ്പളം നൽകാൻ തൊഴിലുടമകൾ ​ശ്രദ്ധിക്കേണ്ടതുണ്ട്​. പ്രവാസികൾ ഉൾപ്പെടെയുള്ള തൊഴിലാളികളുടെ അവകാശങ്ങൾ സംരക്ഷിക്കുന്ന നിയമമാണ്​ രാജ്യത്തുള്ളത്​. ഇക്കാര്യം കമ്പനികൾ പാലിക്കുന്നുണ്ടെന്ന്​ തൊഴിൽ, സാമൂഹിക വികസന മന്ത്രാലയം ഉറപ്പാക്കണമെന്നും അദ്ദേഹം പറഞ്ഞു. തൊഴിലാളികളുടെ പ്രിയ രാജ്യമെന്ന പദവിയുള്ള ഇടമാണ്​ ബഹ്​റൈനെന്നും അദ്ദേഹം വ്യക്​തമാക്കി. -

പ്രധാനമന്ത്രിയുടെ ഇടപെടൽ മാസങ്ങളായി ശമ്പളം മുടങ്ങിയ ജി.പി.സെഡ്​ കമ്പനിയിലെ തൊഴിലാളികൾക്ക്​ ഗുണകരമാകും. ജി.പി.സെഡിലെ തൊഴിലാളികൾ ശമ്പള കുടിശ്ശികയുടെ പേരിൽ പ്രതിഷേധവുമായി ബുധനാഴ്​ച വീണ്ടും തെരുവിലിറങ്ങിയിരുന്നു. ഏതാണ്ട്​ 80ഒാളം പേരാണ്​ അൽ ഇസ്​തിഖ്​ലാൽ ഹൈവെയിൽ സംഘടിച്ചിറങ്ങിയത്​. കഴിഞ്ഞ അഞ്ചുമാസമായി തങ്ങൾക്ക്​ ശമ്പളം ലഭിച്ചില്ലെന്ന്​ തൊഴിലാളികൾ ആരോപിച്ചു.ശമ്പളം ഉടൻ ലഭിക്കണമെന്ന്​ അവർ ആ​വശ്യപ്പെട്ടു. തുടർന്ന്​ ഇന്ത്യൻ എംബസി ഉദ്യോഗസ്​ഥരും സാമൂഹിക പ്രവർത്തകരും സ്​ഥലത്തെത്തി തൊഴിലാളികളുമായി സംസാരിച്ചിരുന്നു.    കഴിഞ്ഞ ദിവസം ​‘മെർക്കുറി മിഡിൽ ഇൗസ്​റ്റ്’ കമ്പനിയിലെ 15 തൊഴിലാളികളും ഇൗസ ടൗണിലെ തൊഴിൽ, സാമൂഹിക വികസന മന്ത്രാലയ ഒാഫിസിന്​ പുറത്ത്​ പ്രതിഷേധവുമായി സംഘടിച്ചിരുന്നു. 

തങ്ങൾക്ക്​ ആറുമാസമായി ശമ്പളം കിട്ടിയി​ട്ടില്ലെന്നാണ്​ ഇൗ തൊഴിലാളികൾ പറയുന്നത്​. ഇവിടെ 300ഒാളം തൊഴിലാളികൾക്ക്​ ശമ്പള കുടിശ്ശിക ലഭിക്കാനുണ്ടെന്ന്​ പ്രാദേശിക പത്രം റിപ്പോർട്ട്​ ചെയ്​തിരുന്നു. ഏതാനും ദിവസങ്ങൾക്ക്​ മുമ്പും ഇവർ ശമ്പള ​പ്രശ്​നത്തിൽ പ്രതിഷേധവുമായി രംഗത്തിറങ്ങിയിരുന്നു.   പ്രധാനമന്ത്രിയുടെ ഇടപെടലുണ്ടായതോടെ, പ്രശ്​നങ്ങൾ അടിയന്തരമായി പരിഹരിക്കപ്പെടാനുള്ള സാധ്യതയാണ്​ തെളിഞ്ഞത്​.