പ്രവാസി വെൽഫെയർ ഈദ് ഫെസ്റ്റ്: ബാബ ഖലീൽ ഉദ്ഘാടനം ചെയ്യും

മനാമ: പ്രവാസി വെൽഫെയർ ഈദ് ഫെസ്റ്റ് മെയ് 28 വ്യാഴാഴ്ച 12 മണി മുതൽ സഗയയിലുള്ള ബിഎംസി ഓഡിറ്റോറിയത്തിൽ നടക്കും. സാമൂഹിക സേവന രംഗത്തെ സമാനതകളില്ലാത്ത വ്യക്തിത്വവും 'അഗതികളുടെ പിതാവ്' എന്ന പേരിൽ പ്രശസ്തനുമായ ബാബ ഖലീൽ ചടങ്ങ് ഉദ്ഘാടനം ചെയ്യും. ആയിരത്തോളം പ്രവാസികൾക്കായി ഒരുക്കുന്ന സാഹോദര്യ ഈദ് ലഞ്ച് സൽക്കാരവും വൈവിധ്യമാർന്ന കലാ-സാംസ്കാരിക പരിപാടികളുമാണ് ഫെസ്റ്റിൽ ഒരുക്കിയിരിക്കുന്നത്. പ്രവേശനം പാസ് മൂലം. ക്ഷണിക്കപ്പെട്ടവർക്ക് മാത്രമായിപരിമിതപ്പെടുത്തിയ ഈദ് ഫെസ്റ്റിൽ ഉച്ചയ്ക്ക് മൂന്ന് മുതൽ രാത്രി വരെ നീളുന്ന കലാപരിപാടികൾ ആസ്വദിക്കാൻ എല്ലാവർക്കും സൗകര്യമൊരുക്കിയിട്ടുണ്ട്.