പൊന്നൻ വിഷയം: അന്വേഷിച്ച്​ നടപടിയെടുക്കാൻ മുഖ്യമന്ത്രിയുടെ ഒാഫീസിൽ നിന്ന്​ നിർദേശം

മനാമ:  ഏഴ്​ വർഷമായി ഒാർമ നഷ്​ടപ്പെട്ട്​ ബഹ്​റൈനിൽ ആശുപത്രിയിൽ കിടക്കുന്ന എറണാകുളം സ്വദേശി പൊന്ന​​​െൻറ നാട്ടിലെ ബന്​ധുക്കളെ  കുറിച്ചുള്ള വിവരങ്ങൾ അന്വേഷിച്ച്​ കണ്ടെത്തുന്നതിനും ഇദ്ദേഹത്തെ നാട്ടിലേക്ക്​ കൊണ്ടുവരുന്നതിനുമായി  അന്വേഷിച്ച്​ നടപടിയെടുക്കാൻ കേരള മുഖ്യമന്ത്രിയുടെ ഒാഫീസിൽ നിന്ന്​ നിർദേശം നൽകിയതായി മുഖ്യമന്ത്രിയുടെ ഒാഫീസിലെ കംപ്യൂട്ടർ സെൽ അണ്ടർ സെക്രട്ടറി അറിയിച്ചു. ‘ഗൾഫ്​ മാധ്യമം’ ഇന്നലെ പ്രസിദ്ധീകരിച്ച വാർത്ത സഹിതം ‘പ്രതിഭ  ബഹ്​റൈൻ’ നേതാവ്​  പി.ടി നാരായണൻ നൽകിയ അപേക്ഷ കണക്കിലെടുത്താണ്​ നിർദേശം നൽകിയത്​. ഇത്​ സംബന്​ധിച്ച്​ പി.ടി നാരായണന്​ മുഖ്യമന്ത്രിയുടെ ഒാഫീസിലെ കംപ്യൂട്ടർ സെൽ അണ്ടർ സെക്രട്ടറി അറിയിപ്പ്​ നൽകിയിട്ടുണ്ട്​.

ഏഴ്​ വർഷമായി സ്വയം മറന്ന നിലയിൽ ആശുപത്രി കിടക്കയിൽ കഴിയുന്ന എറണാകുളം സ്വദേശിയായ 52 കാര​നെ കുറിച്ചുള്ള വാർത്ത ‘ഗൾഫ്​ മാധ്യമ’മാണ്​ പുറത്തുകൊണ്ടുവന്നത്​. തുടർന്ന്​ ഇയ്യാളെ കുറിച്ചുള്ള ചില സൂചനകൾ ഒരാൾ ‘ഗൾഫ്​ മാധ്യമം’ ഒാഫീസിലേക്ക്​ വിളിച്ചറിയിച്ചിരുന്നു. അതുപ്രകാരമാണ്​ പൊന്നൻ എന്ന വിളിപ്പേരും എറണാകുളം ജില്ലക്കാരനാണെന്നും പെയിൻറിങ്​ ജോലിക്കിടെ കെട്ടിടത്തിൽ നിന്ന്​ വീണ്​ പരി​ക്കേറ്റതായും വെളിപ്പെട്ടത്​. ആശുപത്രിയിൽ കഴിയുന്ന പൊന്നൻ ത​​​െൻറ പേര്​ പൊന്നപ്പൻ എന്ന്​ ചിലപ്പോൾ പറയുന്നുണ്ടെങ്കിലും ചിലപ്പോൾ മറ്റ്​ പേരാണ്​ പറയുക.

ബന്​ധുക്കളെ കുറിച്ചോ നാടിനെ കുറിച്ചോ ഇദ്ദേഹത്തിന്​ കൃത്യമായ ധാരണയില്ല. ആശുപത്രി രേഖകളിൽ ‘പുരു’ എന്നാണ്​ രേഖപ്പെടുത്തിയിരിക്കുന്നത്​. എന്നാൽ പാസ്​പോർട്ട്​ നമ്പരോ മറ്റ്​ രേഖകളോ ആശുപത്രിയിലും ഇല്ല. ആദ്യം സൽമാനിയ ആശുപത്രിയിൽ കഴിഞ്ഞ പൊന്നനെ തുടർന്ന്​ മുഹറഖ് ജെറിയാട്രിക് ആശുപത്രിയിൽ പ്രവേശിപ്പിക്കുകയായിരുന്നു. ഉറ്റവരും ഉടയവരും ഇല്ലാത്ത രോഗികളെ പരിചരിക്കുന്ന ഇവിടെ ഇ​ദ്ദേഹം എളുപ്പം സുഖം പ്രാപിച്ചു​വെങ്കിലും ഒാർമ തിരികെ കിട്ടാത്ത നിലയിലാണ്​.