‘അനന്തരം ഇൗ മനുഷ്യനെ എല്ലാവരും മറവിക്ക്​ വിട്ടുകൊടുത്തു’

മനാമ:  ഏഴ്​ വർഷമായി ആശുപത്രി കിടക്കയിൽ മലയാളി സ്വന്തം പേരുപോലും മറന്ന നിലയിൽ കിടക്കയിൽ കിടക്കുന്നുവെന്ന വാർത്ത പുറത്തുവന്നിട്ടും പ്രതികരണമില്ലാ​െത  പ്രവാസി മലയാളികൾ. മുഹറഖ് ജെറിയാട്രിക് ആശുപത്രിയിലാണ്​ മലയാളിയായ ഹതഭാഗ്യൻ വർഷങ്ങളായി കഴിയുന്നത്​. 
എറണാകുളം സ്വദേശിയാണെന്നും പൊന്നൻ, പൊന്നപ്പൻ  എന്നീ പേരുകളിൽ അറിയപ്പെടുന്ന ആളാണെന്നും ഉള്ള സൂചന മാത്രമാണ്​ ഇതുവരെ പുറത്തുവന്നിട്ടുളളത്​. ആശുപത്രി രേഖകളിലെ പേര്​ ‘പുരു’ എന്നും വയസ്​ 52 എന്നുമാണ്​ രേഖപ്പെടുത്തിയിരിക്കുന്നത്​. . ഇദ്ദേഹത്തെ സന്ദർശിക്കാനും ബന്​ധപ്പെട്ട കാര്യങ്ങൾ അന്വേഷിക്കാനും വിരലിൽ എണ്ണാവുന്ന മലയാളി സാമൂഹിക പ്രവർത്തകർ മാത്രമാണ്​ രംഗത്തെത്തിയത്​. തൊട്ടതിനും പിടിച്ചതിനും പ്രസ്​താവനകൾ ഇറക്കുന്ന മലയാളി പ്രവാസി സംഘടന നേതാക്കളിൽ പലരും ഇൗ നിരാലംബനായ മനുഷ്യ​​​െൻറ കഥ അറിഞ്ഞമട്ട്​ കാണിക്കുന്നില്ലെന്ന്​ വിമർശനമുണ്ട്​. ഗൾഫ്​ മാധ്യമം ഇ​േദ്ദഹത്തെ ക​ുറിച്ചുള്ള വാർത്തകൾ പ്രസിദ്ധീകരിച്ചതിനെ തുടർന്ന്​ ഇയ്യാളെ കുറിച്ച​ുള്ള ചില വിവരങ്ങൾ പുറത്തുവന്നിരുന്നു. 

പൊന്നൻ എന്നാണ്​ വിളിപ്പേര്​ എന്നും 10 വർഷത്തിലേറെയായി ബഹ്​റൈനിൽ ഉള്ളയാളാണ്​ ഇദ്ദേഹമെന്നും പെയിൻറിങ്​ ജോലിക്കിടെ വീണ്​ പരിക്കേറ്റാണ്​ ആശുപത്രിയിൽ എത്തിയതെന്നുമാണ്​ വിവരം. മതിയായ രേഖകളില്ലാതെയാണ്​ ആ സമയത്ത്​ പൊന്നൻ ജോലി ചെയ്​തിരുന്നതത്രെ. എന്നാൽ ഒാർമ നഷ്​ടപ്പെട്ട ഒരാളുടെ പിന്നാലെ കൂടാൻ ഇൗ വിവരങ്ങൾ അറിയാവുന്നവരും താൽപ്പര്യം കാണിക്കുന്നില്ലത്രെ. മുഴുവൻ ഒാർമകളും നഷ്​ടമായ നിലയിൽ കഴിയുന്ന ‘പൊന്നൻ’ ആശുപത്രി അധികൃതർക്കും ഒരു ചോദ്യചിഹ്​നമാണ്​.  ഇദ്ദേഹത്തെ സ്വന്തം നാട്ടിൽ എത്തിക്കാൻ കഴിയുമെങ്കിൽ നന്നായിരിക്കും എന്നാണ്​ അവരുടെയും അഭിപ്രായം. 

എന്നാൽ പേരോ പാസ്​പോർ​േട്ടാ കൈവശമില്ലാത്തതും പ്രശ്​നത്തി​​​െൻറ സങ്കീർണ്ണത വർധിപ്പിക്കുന്നുണ്ട്​. . ഇദ്ദേഹത്തെ കുറിച്ചുള്ള വിവരങ്ങൾ കേരള പ്രവാസി വകുപ്പി​നെയും എറണാകുളം ജില്ലാ അധികൃതരെയും അറിയിക്കാനുമുള്ള നടപടി ഉണ്ടായാൽ   പൊന്നപ്പ​​​​െൻറ ബന്​ധുക്കളെ കണ്ടെത്താൻ കഴിഞ്ഞേക്കുമെന്നാണ്​ കരുതുന്നത്​.  2011 സെപ്​തംബർ ഏഴിന്​ തലയിൽ ശക്തമായ മുറിവേറ്റ നിലയിലാണ്​ ഇദ്ദേഹത്തെ ആദ്യം സൽമാനിയ മെഡിക്കൽ കോംപ്ലക്​സിൽ  പ്രവേശിപ്പിച്ചത്​. തുടർന്ന്​ അസുഖം ഭേദമായപ്പോൾ, ഉറ്റവരോ ഉടയവരോ ഇല്ലാത്തതിനാൽ അനാഥ രോഗികളെ ചികിത്​സിക്കുന്ന  മുഹറഖ് ജെറിയാട്രിക് ആശുപത്രിയിലേക്ക്​ കൊണ്ടുവരികയായിരുന്നു. ഇവിടെ നൽകിയ മെച്ചപ്പെട്ട ചികിത്​സയിലൂടെ ആരോഗ്യം വീണ്ടെടുക്കാനായിട്ടുണ്ട്​.