ബഹ്‌റൈന്‍ പ്രവാസി സുമനസുകളുടെ കാരുണ്യം തേടുന്നു 

മനാമ: രണ്ടുവൃക്കകയും തകരാറിലായ പ്രവാസി യുവാവ്​ ചികിത്സക്കായി സുമനസുകളുടെ സഹായം തേടുന്നു. ആറു വര്‍ഷത്തോളമായി ജിദ്​ഹാഫ്​സിൽ ഇലക്ട്രീഷ്യന്‍ ആയി ജോലി ചെയ്യുന്ന തൃശൂര്‍ മങ്കര സ്വദേശി പി.വി. സിറാജുദ്ദീന്‍ (29) ആണ് ചികിത്സ സഹായം തേടുന്നത്​. മൂന്ന് മാസങ്ങള്‍ക്ക് മുമ്പ് നിശ്ചയിച്ച വിവാഹത്തിനായി നാട്ടില്‍ പോകുംവഴി ബഹ്‌റൈന്‍ വിമാനത്താവളത്തിൽ വെച്ചാണ്​ സിറാജിന്​ ദേഹാസ്വാസ്​ഥ്യം അനുഭവപ്പെട്ടത്​. തുടർന്ന്​ യാത്ര റദ്ദാക്കി ആശുപത്രിയിൽ കാണിച്ചു. പരിശോധനയില്‍ രണ്ടു വൃക്കകള്‍ക്കും അസുഖം ബാധിച്ചതായി കണ്ടെത്തി.

ഉടനെ സ്പോണ്‍സര്‍ തന്നെ മുൻകയ്യെടുത്ത്​ നാട്ടിലേക്ക് അയക്കുകയും മെഡിക്കല്‍ കോളേജില്‍  ചികിത്സ തുടരുകയും ചെയ്തു. ഇപ്പോള്‍ ഡയാലിസിസ് ചെയ്തു കൊണ്ടിരിക്കുന്ന സിറാജുദ്ദീന് എത്രയും പെട്ടെന്ന് വൃക്ക മാറ്റിവെക്കണമെന്നാണ്​ ഡോക്ടര്‍മാര്‍ നിര്‍ദേശിച്ചത്. സഹോദരന്‍ വൃക്ക നല്‍കാന്‍ തയാറാണെങ്കിലും ശസ്​ത്രക്രിയക്കും മറ്റും  20 ലക്ഷത്തോളം രൂപ ചെലവ്​ വരും. നിർധനരായ കുടുംബത്തിന്​ ഇത്രയും വലിയ സംഖ്യ സമാഹരിക്കാന്‍ പ്രയാസമാണ്​. ഇൗ സാഹചര്യത്തിൽ കെ.എം.സി.സി ജിദ്​ഹാഫ്​സ്​ സിറാജിന്​ സഹായമെത്തിക്കാൻ തീരുമാനിച്ചിട്ടുണ്ട്. അതിനായി ഇന്ന്​ മനാമ കെ. എം.സി.സി ഓഫിസില്‍ സാമൂഹിക രംഗത്തുള്ളവരെ ഉൾപ്പെടുത്തി യോഗം ചേരും. വിവരങ്ങള്‍ക്ക് ഗഫൂര്‍ കൈപ്പമംഗലം (33440197), നവാസ് കൊല്ലം (39533273), എ.പി.ഫൈസല്‍ (39841984), ശിഹാബ്​ പ്ലസ്‌ (36155789) എന്നിവരുമായി ബന്ധപ്പെടാം.