ബഹ്​റൈൻ അന്താരാഷ്​ട്ര വിമാനത്താവളത്തിൽ ഒക്​ടോബർ ഒന്നുമുതൽ പുതിയ ബാഗേജ്​ നയം

മനാമ: ബഹ്​റൈൻ അന്താരാഷ്​ട്ര വിമാനത്താവളത്തിൽ ഒക്​ടോബർ ഒന്നുമുതൽ പുതിയ ബാഗേജ്​ നയം നടപ്പാക്കും. വൃത്താകൃതിയിലുള്ളതോ, പ്രത്യേക ആകൃതിയിൽ അല്ലാത്തതോ, കയറോ ചരടോകൊണ്ട്​ കെട്ടിയതോ ആയ ബാഗുകൾ, പുതപ്പിൽ പൊതിഞ്ഞ ബാഗുകൾ, അയഞ്ഞ സ്ട്രാപ്പുകളുള്ള ബാഗുകൾ എന്നിവക്കാണ്​ നി​േരാധനം. അതേസമയം ബേബി സ്‌ട്രോളറുകൾ, സൈക്കിളുകൾ,വീൽച്ചെയറുകൾ, ഗോൾഫ്​ ബാഗ്​സ്​ എന്നിവക്ക്​ നിരോധനമില്ല. സൗഹൃദപരവും കാര്യക്ഷമവുമായ വിമാനത്താവളം എന്ന നിലയിൽ മുന്നോട്ടുപോകാൻ ബഹ്​റൈൻ അന്താരാഷ്​ട്ര വിമാനത്താവളം ​പ്രതിഞ്​ജാബദ്ധമാണെന്ന്​ ബി.എ.സി ചീഫ്​ എയർപോർട്ട്​ ഒാപറേഷൻസ്​ ഒാഫീസർ മിഖായേൽ മോഹൻബെർഗർ പറഞ്ഞു. മാത്രമല്ല ഉയർന്ന സുരക്ഷയും സുരക്ഷയും ഉറപ്പാക്കാൻ സ്ഥിരതയോടെ പ്രവർത്തിക്കുകയും ചെയ്യുന്നു.

ബാഗേജ് ഹാൻഡ്‌ലിംഗ് സിസ്റ്റത്തി​​െൻറ സമഗ്രത ഉറപ്പാക്കാൻ പുതിയ നിയമങ്ങൾ പിന്തുണയാകും. ഉപഭോക്താക്കൾക്ക് മികച്ച സേവനം എത്തിക്കാനും, വിമാനത്താവള ജീവനക്കാർക്ക് അവരുടെ ദൈനംദിന ചുമതലകൾ നിർവഹിക്കുന്നത് സുരക്ഷിതവും കൂടുതൽ കാര്യക്ഷമവുമാകാനും പുതിയ ബാഗേജ്​ നയത്തിലൂടെ സാധ്യമാകും. ആകൃതിരഹിതമായ ബാഗേജുകളിൽ കയറോ ചരടോ ഉപയോഗിച്ച്​ വരിഞ്ഞിരിക്കുന്നത്​ കൺവയർബെൽറ്റുകളിൽ മുട്ടുന്നതിനും യന്ത്രം ​പ്രവർത്തനരഹിതമാകുന്നതിനും ഒപ്പം ബാഗേജ്​ പ്രവർത്തനങ്ങൾ തടസപ്പെടുന്നതിനും കാരണമാകുന്നുണ്ട്​. ഇത്​ മറ്റ്​ യാത്രികരെ അസൗകര്യത്തിലാക്കുന്നുമുണ്ട്​. സാധാരണ യാത്രാബാഗുകൾ, അല്ലെങ്കിൽ പ്രത്യേകം പായ്​ക്ക്​ ചെയ്​ത പെട്ടികളോ ആകുന്നത്​ ചെക്ക്​-ഇൻ ഏരിയകളിലെ കാലതാമസം ഒഴിവാക്കാൻ കാരണമാകുമെന്നും യാത്രക്കാരോടുള്ള അറിയിപ്പിൽ പറയുന്നു.