സംയുക്​ത ദൗത്യസേനയുടെ നേതൃത്വത്തിൽ  വൻ മയക്കുമരുന്ന്​ വേട്ട

മനാമ: കടൽ വഴി കടത്തുകയായിരുന്ന 400 കിലോ ഹെറോയിൻ ബഹ്​റൈൻ ആസ്​ഥാനമായി പ്രവർത്തിക്കുന്ന സംയുക്​ത ദൗത്യ സേന പിടികൂടി. 
ഇതിന്​ വിപണിയിൽ 155 ദശലക്ഷം ഡോളർ വില വരും.ഏപ്രിൽ 28നും മേയ്​ മൂന്നിനുമാണ്​ നടപടിയുണ്ടായത്​. 
കള്ളക്കടത്തുകാർ ഉപയോഗിച്ച രണ്ട്​ മത്സ്യബന്ധന ബോട്ടുകൾ സംശയത്തെ തുടർന്ന്​ ഫ്രഞ്ച്​ നാവികർ തടയുകയും മയക്കുമരുന്ന്​ പിടികൂടുകയുമായിരുന്നു. കടൽ സുരക്ഷയും ഭീകരവിരുദ്ധ നടപടികളും മുൻ നിർത്തി പ്രവർത്തിക്കുന്ന സംയുക്​ത ദൗത്യ സേന^150 (സി.ടി.എഫ്​^150)യുടെ പതിവ്​ പരി​ശോധനക്കിടയിലാണ്​ ഇവർ പിടിയിലായത്​.ചെങ്കടൽ, ഏദൻ കടലിടുക്ക്​, ഇന്ത്യൻ മഹാസമുദ്രം, ഒമാൻ ഉൾക്കടൽ എന്നിവടങ്ങിലാണ്​ സി.ടി.എഫ്​ പരി​േശാധന നടക്കുന്നത്​.കഴിഞ്ഞ ദിവസം നടന്ന മയക്കുമരുന്ന്​ വേട്ടക്ക്​ നേതൃത്വം നൽകിയത്​ ഫ്രഞ്ച്​ കപ്പലായ എഫ്​.എസ്​. സർകൂഫിലെ നാവികരാണ്​. റോയൽ ന്യൂസിലാൻറ്​ വ്യോമസേനയും ഇവരുടെ സഹായത്തിനെത്തി. മത്സ്യബന്ധന ബോട്ട്​ എവിടെ നിന്ന്​ വരികയാണെന്നോ ഇതിൽ എത്രപേർ അറസ്​റ്റിലായെന്നോ ഉള്ള കാര്യം വ്യക്​തമല്ല.