ക​ന്നി​യ​ങ്ക​ത്തി​ൽ വി​ജ​യ​കി​രീ​ടം

മനാമ: ആദ്യമായി പ​ങ്കെടുത്ത പാചക മത്സരത്തിൽ ഒന്നാംസ്ഥാനം ലഭിച്ചതി​ന്റെ സന്തോഷത്തിലാണ് ആൻസി ജോഷി. ആദ്യ റൗണ്ടിൽ മത്സരിച്ച് 50 പേരെയും ഫൈനൽ റൗണ്ടിലെത്തിയ മറ്റ് ആറുപേരെയും മറികടന്നാണ് ആവേശകരമായ പോരാട്ടത്തിൽ ആൻസി ഒന്നാമതെത്തിയത്.

തൃശൂർ ചിറക്കൽ സ്വദേശിയായ ആൻസി ചെറുപ്പം മുതൽത​ന്നെ പാചക ലോകത്തെത്തിയതാണ്. സർക്കാർ ഉദ്യോഗസ്ഥരായ മാതാപിതാക്കളുടെ തിരക്കുകളാണ് 12ാം വയസ്സിൽതന്നെ വീട്ടിലെ പാചകജോലി ഏറ്റെടുക്കാൻ കാരണമായത്. വീട്ടിൽനിന്ന് ഏറെ ദൂരെയുള്ള ജോലിസ്ഥലത്തേക്ക് അത്യാവശ്യം ജോലികൾ തീർത്ത് അമ്മ അതിരാവിലെ തന്നെ പുറപ്പെടും. അതിനാൽ, മറ്റ് സ​ഹോദരങ്ങൾക്കുള്ള ഭക്ഷണം തയാറാക്കുന്നതിനും മറ്റും ആൻസിയാണ് മുന്നിൽ നിന്നത്. ക്രമേണ, പാചകത്തോട് ഇഷ്ടം കൂടിവന്നു. ഈ ഇഷ്ടമാണ് മാസ്റ്റർ ഷെഫ് പാചകമത്സര വേദിയിൽ അഭിമാനത്തോടെ ഒന്നാംസമ്മാനം ഏറ്റുവാങ്ങാൻ ഇടയാക്കിയത്.

ആദ്യ മത്സരത്തിൽതന്നെ വിജയിക്കാൻ കഴിഞ്ഞതിൽ അതിയായ സന്തോഷമുണ്ടെന്ന് ആൻസി ജോഷി പറഞ്ഞു. ഇത്രയും വലിയൊരു മത്സരത്തിൽ പ​ങ്കെടുക്കാൻ സാധിച്ചതും ഷെഫ് പിള്ളയെ അടുത്ത് കാണാൻ കഴിഞ്ഞതും ഏറെ സന്തോഷം നൽകിയെന്ന് അവർ പറഞ്ഞു. ബഹ്റൈനിൽ ബിസിനസ് ചെയ്യുന്ന ജോഷി മാളിയേക്കലാണ് ഭർത്താവ്. സെലിൻ മേരി, അലൻ ജോഷി, ആലിയ മേരി എന്നിവർ മക്കളാണ്.