മലയാളം മിഷൻ ബഹ്​റൈൻ ചാപ്​റ്റർ ഉദ്​ഘാടനം ചെയ്​തു

മനാമ: സാംസ്​കാരിക കേരളത്തിന്​ ഉണർവും പുതിയ ദിശാബോധവും നൽകാനുതകുന്ന നയങ്ങളാണ്​ കേരള സർക്കാർ സ്വീകരിച്ചു വരുന്നതെന്നും  മതനിരപേക്ഷത ഉൗട്ടിയുറപ്പിക്കുന്ന പ്രവർത്തനങ്ങളുമായി മുന്നോട്ട്​ പോകുമെന്നും കേരള സാംസ്​കാരിക വകുപ്പ്​ സെക്രട്ടറി റാണി ജോർജ് പറഞ്ഞു.​ കേരള സർക്കാറി​ന്​ കീഴിലുള്ള ‘മലയാളം മിഷ​​െൻറ’ ബഹ്​റൈൻ ചാപ്റ്റർ ഉദ്​ഘാടനം നിർവഹിച്ച്​ സംസാരിക്കുകയായിരുന്നു അവർ. സാംസ്​കാരിക  രംഗത്ത് പുതിയ നിരവധി  പദ്ധതികളാണ്​ നടപ്പാക്കി വരുന്നത്​. ഇതി​​െൻറ പ്രോജക്​ട്​ ജോലികൾക്ക്​ തുടക്കമായിട്ടുണ്ട്​.  തിരുവനന്തപുരത്ത്​ ഫിലിംസിറ്റി, ഗ്രാമങ്ങളിൽ തിയറ്ററുകൾ എന്നിവക്കായുള്ള പ്രവർത്തനവും തുടങ്ങിയിട്ടുണ്ട്. നൃത്തം, കഥകളി, വിവിധ കലാരൂപങ്ങൾ തുടങ്ങിയവ പഠിച്ചിറങ്ങുന്നവരിൽ യോഗ്യരായവർക്ക്​ ഫെലോഷിപ്പ്​ നൽകി വരുന്നുണ്ട്.  ഇന്ത്യക്ക്​ പുറത്ത്​ താമസിക്കുന്ന മലയാളി സമൂഹത്തി​​െൻറ ഭാഷാ പഠനം മെച്ചപ്പെടുത്തുന്നതിനാണ്​ മലയാളം മിഷൻ ഒാ​േരാ രാജ്യത്തും പ്രത്യേക ചാപ്​റ്റർ തുടങ്ങുന്നതെന്ന്​ അവർ പറഞ്ഞു.

സമാജം ഹാളിൽ ചേർന്ന പരിപാടിയിൽ മലയാളം മിഷൻ ഡയറക്​ടർ പ്രഫ. സുജ സൂസൻ ജോർജ്​ പ​െങ്കടുത്തു. പ്രവാസ ലോകത്തേക്ക്​  കുടിയേറിയ ഒാരോ മലയാളിയിലും കേരളത്തി​​െൻറ ഭാഷയും സംസ്​കാരവും ഉണ്ടെന്ന്​ അവർ പറഞ്ഞു. സാംസ്​കാരിക പൈതൃകം കാത്തുസൂക്ഷിക്കാൻ വെമ്പൽകാട്ടുന്ന മലയാളി സമൂഹത്തെയാണ്​ ഗൾഫ്​ നാടുകളിൽ കാണാൻ കഴിഞ്ഞതെന്നും സൂസൻ ജോർജ്​ പറഞ്ഞു.സമാജം പ്രസിഡൻറ്​ പി.വി. രാധാകൃഷ്​ണപിള്ള അധ്യക്ഷത വഹിച്ചു. 
സെക്രട്ടറി എൻ.കെ. വീരമണി സ്വാഗതം പറഞ്ഞു. സാഹിത്യ വിഭാഗം സെക്രട്ടറി കെ.സി. ഫിലിപ്പ്​ പാഠശാല പ്രവർത്തനങ്ങളെ കുറിച്ച്​ സംസാരിച്ചു. 
ബഹ്​റൈനിലെ പ്രവർത്തനങ്ങൾക്കായി പി.വി. രാധാകൃഷ്​ണപിള്ള കോഒാഡിനേറ്ററായി  25 അംഗങ്ങൾ അടങ്ങുന്ന അഡ്​ഹോക്​ കമ്മിറ്റി രൂപവത്​കരിച്ചു. ബഹ്​റൈനിലെ വിവിധ രാഷ്​ട്രീയ, സാംസ്​കാരിക, സംഘടന ​പ്രതിനിധികളെയും പാഠശാല പ്രവർത്തകരെയും കമ്മിറ്റിയിൽ ഉൾപ്പെടുത്തി. പ്രതീപ്​ പതേരി പരിപാടികൾ നിയന്ത്രിച്ചു. വിജയൻ കാവിൽ നന്ദി പറഞ്ഞു.