കുവൈത്തി​െൻറ സഹായങ്ങള്‍ വിലമതിക്കാനാവാത്തത് –പ്രധാനമന്ത്രി 

മനാമ: ബഹ്‌റൈനിലെ അടിസ്ഥാന സൗകര്യ വികസനത്തില്‍ കുവൈത്ത്​ നൽകിവരുന്ന സഹായങ്ങൾ വിലമതിക്കാനാവാത്തതാണെന്ന് പ്രധാനമന്ത്രി പ്രിന്‍സ് ഖലീഫ ബിന്‍ സല്‍മാന്‍ ആല്‍ഖലീഫ വ്യക്തമാക്കി. കഴിഞ്ഞ ദിവസം ബഹ്‌റൈന്‍ സന്ദര്‍ശിക്കാനെത്തിയ കുവൈത്ത് വ്യവസായ പ്രമുഖരെ സ്വീകരിച്ച് സംസാരിക്കുകയായിരുന്നു അദ്ദേഹം. ജി.സി.സി രാഷ്​ട്രങ്ങള്‍ക്കിടയിലെ സാമ്പത്തിക സഹകരണം മേഖലക്ക് ശക്തി പകരുമെന്ന് അദ്ദേഹം അഭിപ്രായപ്പെട്ടു. 

കുവൈത്തി​ന്​ ബഹ്‌റൈനില്‍ നിരവധി നിക്ഷേപ സംരംഭങ്ങളുണ്ടെന്നും കൂടുതൽ പദ്ധതികള്‍ക്ക്​ അനുമതി നൽകുന്നതില്‍ ബഹ്‌റൈന് സന്തോഷമുണ്ടെന്നും അദ്ദേഹം അറിയിച്ചു. ഇരുരാജ്യങ്ങള്‍ക്കും ഗുണകരമായ പദ്ധതികള്‍ ആരംഭിക്കുക വഴി സാമ്പത്തിക സഹകരണം മെച്ചപ്പെടുത്തുന്നതിനുമുള്ള സാധ്യതകള്‍ ചര്‍ച്ച ചെയ്തു. മേഖലയിലെയും അന്താരാഷ്​ട്ര തലത്തിലെയും വിവിധ സംഭവ വികാസങ്ങളും ചര്‍ച്ചയില്‍ ഉയര്‍ന്നു.