അർഹരായ കുടുംബങ്ങൾക്ക്​ റമദാൻ സഹായം വിതരണം ചെയ്യാൻ ഹമദ്​ രാജാവിന്‍റെ ഉത്തരവ്​

മനാമ: അർഹരായ കുടുംബങ്ങൾക്ക്​ റമദാൻ സഹായം വിതരണം​ ചെയ്യാൻ രാജാവ്​ ഹമദ്​ ബിൻ ഈസ ആൽ ഖലീഫ ഉത്തരവിട്ടു. റോയൽ ഹ്യൂമാനിറ്റേറിയൻ ഫൗണ്ടേഷനിൽ രജിസ്റ്റർ ചെയ്​ത കുടുംബങ്ങൾക്കാണ്​ ഇതിന്​ അർഹതയുണ്ടായിരിക്കുക. ആർ.എച്ച്​.എഫിൽ രജിസ്റ്റർ ചെയ്​ത കുടുംബങ്ങളിൽ സന്തോഷവും ആഹ്ലാദവും നിറക്കാനും ഭക്ഷണ വസ്​തുക്കൾ ഉറപ്പാക്കാനും പ്രസ്​തുത സഹായം വഴി സാധ്യമാവും.

യുവജന, ചാരിറ്റി കാര്യങ്ങൾക്കായുള്ള ഹമദ്​ രാജാവിന്‍റെ പ്രതിനിധി ശൈഖ്​ നാസിർ ബിൻ ഹമദ്​ ആൽ ഖലീഫ ഇത്തരമൊരു നിർദേശം നൽകിയ ഹമദ്​ രാജാവിന്​ പ്രത്യേകം നന്ദി അറിയിക്കുകയും ചെയ്​തു.

ഹമദ്​ രാജാവ്​ നൽകിയ നിർദേശ പ്രകാരം സഹായങ്ങൾ നൽകുമെന്ന്​ ആർ.എച്ച്​.എഫ്​ സെക്രട്ടറി ജനറൽ ശൈഖ്​ അലി ബിൻ ഖലീഫ ആൽ ഖലീഫ വ്യക്തമാക്കി. 11,000 കുടുംബങ്ങൾക്കാണ്​ സഹായം ലഭിക്കുക. ഇത്തരമൊരു രാജകാരുണ്യം നിരവധി കുടുംബങ്ങൾക്ക് സഹായമായിരിക്കുമെന്നും അദ്ദേഹം കൂട്ടിച്ചേർത്തു.