ബഹ്​റൈൻ കേരളീയ സമാജം തെരഞ്ഞെടുപ്പ്​ മൂന്നുമാസത്തിനുള്ളിൽ നടത്തണം

മനാമ: ബഹ്​റൈൻ കേരളീയ സമാജം ഭരണസമിതിയുടെ കാലാവധി രണ്ട്​ വർഷമാക്കിയ നടപടി റദ്ദാക്കുകയും മൂന്നുമാസത്തിനുള്ളിൽ തെരഞ്ഞെടുപ്പ്​ നടത്തണണമെന്നും സാമൂഹിക കാര്യമ​ന്ത്രാലയം ഉത്തരവിറക്കി. സമാജം ഭരണസമിതിയുടെ കാലാവധി നീട്ടിയ ന ടപടിക്കെതിരെ തങ്ങൾ നടത്തിയ നിയമപോരാട്ടമാണ്​ ഫലം കണ്ടിരിക്കുന്നതെന്ന്​ പ്രോഗ്രസീവ്​ പാനൽ നേതാക്കൾ വാർത്താസ​മ്മേളനത്തിൽ അറിയിച്ചു.

ബഹ്​റൈൻ സാമൂഹിക കാര്യമന്ത്രാലയത്തി​​െൻറ നിർദേശങ്ങൾ സമാജം ഭരണസമിതി,തെറ്റായി പ്രചരിപ്പിച്ചതി​​െൻറ പേരിലാണ്​ മന്ത്രാലയം ഇൗ നടപടി കൈക്കൊണ്ടതെന്നും നേതാക്കൾ വ്യക്തമാക്കി. നിലവിലുള്ള കമ്മിറ്റിക്ക് ഭരണ നിർവഹണാധികാരം ഇല്ല. രണ്ട് മാസത്തിനുള്ളിൽ സമാജം കഴിഞ്ഞ വർഷം നടത്തിയ സാമ്പത്തിക ക്രയവിക്രയങ്ങൾ ഉൾപ്പെടെയുള്ളവയുടെ രേഖകൾ പരിശോധനാർഥം സമർപ്പിക്കണം. ഇതിനുശേഷമുള്ള ഒരു മാസത്തിനകം തെരഞ്ഞെടുപ്പ്​ നടത്തണമെന്നും മന്ത്രാലയം ഗസറ്റ്​ വിജ്​ഞാപനം നടത്തിയതായും പ്രോഗ്രസീവ്​ പാനൽ നേതാക്കൾ പറഞ്ഞു.

സമാജം ഭരണസമിതിയോട്​ ഈ വർഷം തെരഞ്ഞെടുപ്പ് നടത്തേണ്ടതില്ല എന്ന് മന്ത്രാലയം നിർദ്ദേശിച്ചു എന്നുകാട്ടിയാണ്​ അംഗങ്ങൾക്കിടയിൽ വ്യാജ പ്രചാരണം നടത്തിയത്​. ഭരണസമിതിയുടെ തെറ്റായ നടപടികളെ ചോദ്യം ചെയ്യുന്നവരെ സമാജത്തെ പൂട്ടിക്കാൻ നടക്കുന്നവർ എന്ന് പറഞ്ഞ് വ്യക്തിഹത്യ നടത്തുന്നതും ഭരണസമിതിയുടെ രീതിയാണെന്നും പ്രോഗ്രസീവ്​ നേതാക്കൾ ആരോപിച്ചു.