പ്രളയബാധിതരായ പ്രവാസികൾക്ക്​ നഷ്​ടപരിഹാരം ഉറപ്പുവരുത്തണം

മനാമ: കേരളത്തിൽ പ്രളയബാധിതരായ പ്രവാസികൾക്ക്​ അർഹമായ ആനുകൂല്ല്യങ്ങൾ ഉറപ്പുവരുത്തണമെന്ന്​ ആവ​ശ്യമുയരുന്നു. ​പ്രളയബാധ നേരിട്ട പ്രവാസികളുടെ വീടുകൾക്ക്​ ഇക്കാര്യത്തിൽ യാതൊരുവിധ അവഗണനയും ഉണ്ടാകാതിരിക്കാൻ അധികൃതരുടെ സത്വര ശ്രദ്ധ പതിയേണ്ട സാഹചര്യമാണുള്ളത്​. പ്രവാസി വീടുകളിലെ ഗൃഹനാഥൻമാരിൽ പലരും വിദേശത്ത്​ ആയതിനാൽ നഷ്​ടപരിഹാരത്തിനുവേണ്ടിയും നഷ്​ടമായ രേഖകൾ വീണ്ടും നേടുന്നതിനും ബുദ്ധിമുട്ട്​ ​നേരിടുന്ന സാഹചര്യം നിലനിൽക്കുന്നുണ്ട്​.

പ്രളയക്കെടുതിയിൽപ്പെട്ട ചില പ്രവാസി കുടുംബങ്ങളോട്​ ഗൃഹനാഥ​​െൻറ ആധാർ കാർഡി​​െൻറ നമ്പർ നൽകാൻ ആവശ്യപ്പെട്ടതായും പരാതിയുണ്ട്​. പ്രവാസിയായതിനാൽ പല പ്രവാസികൾക്കും ആധാർ കാർഡ്​ ഇല്ല. സർക്കാർ ആഫീസുകളിലെ പതിവ്​ നൂലാമാലകൾ കാരണം ​ പ്രവാസികളായ പ്രളയത്തിലെ ഇരകൾക്ക്​ നഷ്​ടപരിഹാരം ലഭിക്കാതെ പോകരുതെന്നാണ്​ പൊതുവായുള്ള അഭിപ്രായം. തങ്ങളുടെ കുടുംബത്തിനുണ്ടായ നാശനഷ്​ടങ്ങളെ കുറിച്ച്​ കൃത്യമായ കണ​ക്കെടുപ്പ്​ നടത്തി നഷ്​ടപരിഹാരം ലഭിക്കാൻ നടപടി ഉണ്ടാകുമോ എന്നുള്ള ആശങ്കകൾ പലരും പങ്കു​വെക്കുന്നുണ്ട്​. പ്രളയത്തിൽ വീടിന്​ നാശം ഉണ്ടായതിനെ തുടർന്ന്​, പത്തനംതിട്ടക്കാരനായ ഒരു പ്രവാസിയുടെ ഭാര്യ നൽകിയ അപേക്ഷ വില്ലേജ്​ ആഫീസർ മുടന്തൻ ന്യായം പറഞ്ഞ്​ സ്വീകരിച്ചിട്ടില്ലെന്നും പരാതി ഉയർന്നിരുന്നു.

പ്രളയത്തി​​െൻറ ഭാഗമായുള്ള നാശനഷ്​ടങ്ങളുടെ കണക്കെടുപ്പിലും നഷ്​ടപരിഹാര വിതരണത്തിലും പ്രവാസി കുടുംബങ്ങൾക്ക്​ അർഹമായ പരിഗണന ഉണ്ടാകണമെന്നതാണ്​ പൊതുവായി ഉയരുന്ന ആവശ്യം. നഷ്​ടപരിഹാരത്തിനായി കയറിയിറങ്ങുന്ന ഇരകളുടെ ആധിക്യമാണ്​ ഇന്ന്​ കേരളത്തിലെ വില്ലേജ്​, ഗ്രാമപഞ്ചായത്ത്​, താലൂക്ക്​ ആഫീസുകളിലുള്ളത്​. എന്നാൽ പ്രവാസികൾ ഗൃഹനാഥൻമാരായ വീടുകളിൽ സ്​ത്രീ​കളും കുട്ടികളും അല്ലെങ്കിൽ പ്രായമായവർ മാത്രമുള്ള അവസ്ഥയാണ്​. പ്രവാസി കുടുംബങ്ങൾ ഗൾഫിലായ ചിലരുടെ വീടുകൾ പൂട്ടികിടക്കുന്നുണ്ട്​.

അതിനാൽ നഷ്​ടപരിഹാരത്തിനും നഷ്​ടമായ രേഖകൾ സംഘടിപ്പിക്കാനും സർക്കാർ ഒാഫീസുകളിൽ കയറിയിറങ്ങാൻ പരിമിതികളുള്ള അവസ്ഥയുണ്ട്​.
പ്രളയക്കെടുതിയിൽ ബഹ്​റൈനിലെ നിരവധി പ്രവാസികളുടെ വീടുകളും സാധനങ്ങളും കൃഷിയും നശിക്കപ്പെട്ടിട്ടുണ്ട്​. നിരവധി പ്രവാസി കുടുംബങ്ങൾ ഇപ്പോഴും ബന്​ധുവീടുകളിലോ ദുരിതാശ്വാസ ക്യാമ്പുകളിലോ കഴിയുന്ന സാഹചര്യവുമുണ്ട്​. പ്രവാസ ജീവിതം കൊണ്ട്​ കെട്ടിപ്പടുത്ത വീടും വീട്ടുസാധനങ്ങളും വാഹനങ്ങളും ഒറ്റയടിക്ക്​ വെള്ളപ്പൊക്കത്തിൽ നശിക്കപ്പെട്ടതി​​െൻറ ആഘാതത്തിലാണ്​ പലരും. എന്ത്​ നഷ്​ടപരിഹാരം ലഭിച്ചാലും തങ്ങൾക്ക്​ പോയത്​ തിരികെ കിട്ടില്ലെന്ന്​ ഇവർ വേദനയോടെ പറയുന്നു. എന്നാൽ ലഭിക്കേണ്ട അർഹമായ ആനുകൂല്ല്യങ്ങൾ ലഭിക്കാതിരിക്കുകയാണങ്കിൽ തങ്ങളുടെ ജീവിതം കൂടുതൽ ഇരുട്ടിലാകുമെന്നാണ്​ പ്രവാസി സമൂഹത്തി​​െൻറ ഒാർമപ്പെടുത്തൽ.

ബഹ്​റൈൻ മലയാളി സമൂഹത്തിലെ നൂറുകണക്കിന്​ പ്രവാസികളാണ്​ പ്രളയത്തി​​െൻറ അനന്തര ഫലങ്ങൾ നേരിടുന്നത്​. എറണാകുളം, വയനാട്​, കോഴിക്കോട്​, മലപ്പുറം, കണ്ണൂർ, പാലക്കാട്​, തൃശൂർ, പത്തനംതിട്ട ജില്ലക്കാരായ നിരവധി പ്രവാസികൾ നഷ്​ടങ്ങളുടെ വെളിപ്പെടുത്തലുമായി രംഗത്തെത്തുന്നുണ്ട്​. ഗൃഹനാഥൻമാർ വിദേശത്തായതിനാൽ തങ്ങളുടെ കുടുംബത്തിലുണ്ടായ യഥാർഥ നഷ്​ടങ്ങളുടെ കണക്കുകൾ പോലും ശരിക്കും തിട്ടപ്പെടുത്താൻ കഴിയാത്ത അവസ്ഥയാണ്​. ചിലരുടെ വീടുകളുടെ ഭിത്തിയിൽ വിളളൽ വീണ അവസ്ഥയാണ്​. വീടുകളിൽ വെള്ളം കയറി ഗൃഹോപകരണങ്ങളും വൈദ്യുതീകരവും പാടെ തകർന്ന അവസ്ഥയുമുണ്ട്​. ചില വീടുകളിൽ ചളിയും ദുർഗന്​ധവും ഒപ്പം പാമ്പി​​െൻറ ശല്ല്യവും പ്രശ്​നമായി നിൽക്കുന്നു. പ്രവാസികളുടെ വീടുകളിൽ ശുചീകരണത്തിന്​ ആളെവെച്ച്​ ചെയ്യിക്കേണ്ട അവസ്ഥയുമുണ്ടായെന്ന്​ ചൂണ്ടിക്കാട്ടുന്നു.

സന്നദ്ധ പ്രവർത്തകരും രാഷ്​ട്രീയ കക്ഷി പ്രവർത്തകരും വീടുകൾ ​ശുചീകരിക്കാൻ വ്യാപകമായി ഇറങ്ങിത്തിരിച്ചപ്പോൾ അതി​​െൻറ ഗുണം പ്രവാസികളിൽ പലരുടെയും വീടുകൾക്ക്​ ലഭിക്കാതെ പോയി. സമൂഹത്തിൽ പ്രവാസികളോടുള്ള സമൂഹത്തി​​െൻറ മനോഭാവം ഇനിയും മാറേണ്ടതുണ്ടെന്നും ഇൗ അനുഭവങ്ങൾ സൂചിപ്പിക്കുന്നതായി ഇരകൾ പറയുന്നു.