വിലകുറഞ്ഞു; സ്വർണ്ണം വാങ്ങാൻ കടകളിൽ തിരക്ക്​

മനാമ: അവധിക്കാലത്ത് കുടുംബങ്ങൾ നാട്ടിലേക്ക്​ പോകുന്നതും സ്വർണ്ണത്തിന്​ വിലക്കുറഞ്ഞതും സ്വർണ്ണക്കടകളുടെ വിൽപ്പന വർധിപ്പിച്ചു. കഴിഞ്ഞ ദിവസം വില ഗ്രാമിന്​ 22 കാരറ്റിന്​ 14.700 ദിനാറും 24 കാരറ്റിന്​ 15.700 ദിനാറുമായിരുന്നു. അടുത്തിടെയായുളള ഏറ്റവും കുറഞ്ഞ വിലയാണിത്​. സാധാരണ സ്വർണ്ണ വിൽപ്പന കുതിച്ചുയരുന്നത്​ അവധിക്കാലത്താണ്​. കുടുംബങ്ങളായി പ്രവാസികൾ നാട്ടിലേക്ക്​ പോകു​േമ്പാൾ സ്വർണ്ണാഭരണങ്ങൾ വാങ്ങാറുള്ളതാണ്​ അതിന്​ കാരണം. ഗൾഫ്​ സ്വർണ്ണത്തോട്​  ഇന്ത്യക്കാർക്ക്​ ഏറെ പ്രിയമാണ്​.

കഴിഞ്ഞ അവധിക്കാലത്തും ഉയർന്ന വിൽപ്പന ഉണ്ടായിരുന്നു. എന്നാൽ ഇൗ വർഷം മുൻവർഷങ്ങളെക്കാൾ വിൽപ്പന കൂടി. അതി​​െൻറ സന്തോഷത്തിലാണ്​ ബഹ്​റൈനിലെ 200 ലേറെയുള്ള സ്വർണ്ണക്കടകളുടെ ഉടമകൾ. കഴിഞ്ഞ ഡിസംബറിലായിരുന്നു ഏറ്റവും വലിയ വിലക്കുറവ്​ ഉണ്ടായിരുന്നത്​.  സ്വർണ്ണം വാങ്ങുന്നതിൽ സ്വദേശികളെക്കാൾ കൂടുതൽ ഇന്ത്യക്കാരാണന്ന്​ മലബാർ ഗോൾഡ്​ ആൻറ്​ ഡയമണ്ട്​സ്​ ബഹ്​റൈൻ ബ്രാഞ്ച്​ ഹെഡ്​ കെ.വി റഫീഖ്​ ‘ഗൾഫ്​ മാധ്യമ’ത്തോട്​ പറഞ്ഞു. സ്വർണ്ണം വാങ്ങുന്നവർക്ക്​ ഇത്​ സുവർണ്ണാവസരമാണന്നും അതാണ്​ സ്വർണ്ണക്കടകൾക്ക്​ മുന്നിൽ വൻതിരക്ക്​ അനുഭവപ്പെടുത്തിന്​ കാരണമെന്നും അദ്ദേഹം പറഞ്ഞു.