ഫലസ്തീൻ വിദ്വേഷ പോസ്റ്റ്; ഇന്ത്യൻ ഡോക്ടറെ സ്വകാര്യ ആശുപത്രി പിരിച്ചുവിട്ടു

മനാമ: സമൂഹമാധ്യമത്തിൽ ഫലസ്തീനെതിരെ വിദ്വേഷ പോസ്റ്റിട്ട ഇന്ത്യൻ ഡോക്ടറെ ആശുപത്രി മാനേജ്​മെന്‍റ് പിരിച്ചുവിട്ടു. സ്വകാര്യ ആശുപത്രിയിലെ ഇന്‍റേണൽ മെഡിസിൻ വിഭാഗം ഡോക്ടറായ സുനിൽ ​ജെ. റാവുവാണ് വിദ്വേഷജനകമായ പോസ്റ്റിട്ടത്. വ്യാപക വിമർശനമുയർന്നതിനെത്തുടർന്ന് അദ്ദേഹം സമൂഹമാധ്യമങ്ങളിലൂടെ ക്ഷമ ചോദിച്ചിരുന്നു.

ഡോക്ടറുടെ പോസ്റ്റ് സാമൂഹികമര്യാദയുടെയും സ്ഥാപനത്തിന്‍റെ പെരുമാറ്റച്ചട്ടത്തിന്‍റെയും ലംഘനമായതിനാലാണ് നിയമനടപടികൾ സ്വീകരിക്കുകയും അടിയന്തരമായി പിരിച്ചുവിടുകയും ചെയ്തതെന്ന് ആശുപത്രി അധികൃതർ അറിയിച്ചു.