ഇമാം അൽ ഹുസൈൻ മെഡിക്കൽ ക്ലിനിക് ഉദ്ഘാടനം ചെയ്തു

മനാമ: ആശൂറ ആചരണം സുഗമമായി നടത്തുന്നതിന് രാജാവ് ഹമദ് ബിൻ ഈസ ആൽ ഖലീഫ മുഖ്യപരിഗണനയാണ് നൽകുന്നതെന്ന് ആരോഗ്യമന്ത്രി ഡോ. ജലീല ബിൻത് സായിദ് ജവാദ് ഹസൻ പറഞ്ഞു. ആശൂറ ആചരണത്തോടനുബന്ധിച്ച് മനാമയിൽ ഇമാം അൽ ഹുസൈൻ മെഡിക്കൽ ക്ലിനിക് ഉദ്ഘാടനം ചെയ്യുകയായിരുന്നു അവർ. കാപിറ്റൽ ഗവർണർ ശൈഖ് റാഷിദ് ബിൻ അബ്ദുൽറഹ്മാൻ ആൽ ഖലീഫ, ജാഫ്രി ഔഖാഫ് ചെയർമാൻ യൂസുഫ് സലേഹ് അസ്സാലിഹ് എന്നിവരും ചടങ്ങിൽ പങ്കെടുത്തു. ക്ലിനിക്ക് സജ്ജമാക്കാൻ സർക്കാർ കോഓഡിനേഷൻ കമ്മിറ്റി നൽകിയ പിന്തുണക്ക് ആരോഗ്യമന്ത്രി നന്ദി രേഖപ്പെടുത്തി. ആശൂറ ദിനങ്ങളിൽ എല്ലാവരുടെയും ആരോഗ്യ സുരക്ഷ ഉറപ്പുവരുത്താൻ ആരോഗ്യ മന്ത്രാലയം പ്രതിജ്ഞാബദ്ധമാണെന്നും മന്ത്രി കൂട്ടിച്ചേർത്തു.