ആഘോഷം മാറ്റിവെച്ച്​  പ്രവാസി മലയാളികൾ കൈകൾ കോർത്തു; കേരളത്തിലേക്ക്​ സഹായം ഒഴുകുന്നു

മനാമ: ബലിപ്പെരുന്നാളും പൊന്നോണ ദിനങ്ങളിലും മുൻകൂർ തീരുമാനിച്ച കലാസാംസ്​കാരിക പരിപാടിക​െളല്ലാം റദ്ദുചെയ്​ത്​  അതിനായി നീക്കിവെച്ച തുക കേരളത്തിലെ ദുരിതാശ്വാസ പ്രവർത്തനങ്ങൾക്ക്​ നൽകാനുള്ള ബഹ്​റൈൻ മലയാളി സമൂഹത്തി​​​െൻറ പ്രഖ്യാപനം യാഥാർഥ്യത്തിലേക്ക്​. 
എന്നും നാടിനും നാട്ടുകാർക്കും വേണ്ടി ​ൈകകൾ കോർത്തുപിടിച്ച പ്രവാസി സമൂഹം ഇപ്പോൾ കേരളത്തി​​​െൻറ പുനർനിർമ്മിതിക്കായുള്ള ആഹ്വാനം അക്ഷരാർഥത്തിൽ ഏറ്റെടുത്തിരിക്കുകയാണ്​.

മുഖ്യമന്ത്രിയുടെ ദുരിതാശ്വാസ ഫണ്ടിലേക്ക്​ കൈയച്ച്​ സംഭാവന നൽകുകയാണ്​ മലയാളി സമൂഹം. അതേസമയം  കേരളത്തിലെ പ്രളയക്കെടുതിയിൽ നൂറുകണക്കിന്​ പ്രവാസികൾക്കും നാശനഷ്​ടങ്ങൾ നേരിട്ടതായാണ്​ റിപ്പോർട്ട്​. സ്ഥലവും വീടും പ്രളയത്തിൽ  നശിച്ചവരിൽ  ബഹ്​റൈൻ പ്രവാസികളും ഉൾപ്പെടുന്നു. മാത്രമല്ല  നിരവധി പ്രവാസികളുടെ അയൽവീട​ുകളോ ബന്​ധുക്കളോ സുഹൃത്തുക്കളോ  പ്രളയത്തി​​​െൻറ ദു:ഖം നേരിട്ടവരുമാണ്​. എറണാകുളം, തൃശൂർ, പാലക്കാട്​, മലപ്പുറം, പാലക്കാട്​, കോഴിക്കോട്​, വയനാട്​, പത്തനംതിട്ട, ആലപ്പുഴ, ഇടുക്കി ജില്ലകളിൽ നിന്നുള്ള ബഹ്​റൈൻ പ്രവാസികളിൽ പലർക്കും  വെള്ളപ്പൊക്കത്തി​​​െൻറയും ഉരുൾപ്പൊട്ടലുകളുടെയും തിക്താനുഭവങ്ങൾ പറയാനുണ്ട്​. പ്രത്യക്ഷവും പരോക്ഷവുമായ പ്രളയക്കെടുതികൾ പ്രവാസികളെയും ബാധിച്ച പശ്​ചാത്തലത്തിൽ നാടി​​​െൻറ അതിജീവനത്തിന്​ എല്ലാവിധ തുണയും നൽകേണ്ടതുണ്ടെന്ന്​ സാമൂഹിക സംഘടന ഭാരവാഹികളും ചൂണ്ടിക്കാട്ടുന്നു.

ബഹ്​റൈനിൽ നിന്ന്​ അവധിയാഘോഷിക്കാൻ നാട്ടിൽപോയ നിരവധിപേർ പ്രളയത്തി​​​െൻറ നാശനഷ്​ടങ്ങൾ നേരിൽ കണ്ടു. ഇവരിൽ പലരുടെയും വീട്ടുസാധനങ്ങളും മറ്റും നശിക്കപ്പെട്ടു. കോട്ടയം, എറണാകുളം, ആലുവ മേഖലകളിലുള്ള നൂറുകണക്കിന്​ പ്രവാസികളുടെ വിലപ്പെട്ട സമ്പാദ്യങ്ങൾ ജലം കവർന്നു. കുടുംാബങ്ങളുമായി നാട്ടിൽപോയവരിൽ ചിലർ ഇതി​​​െൻറ ഭാഗമായി എല്ലാം നഷ്​ടമായ അവസ്ഥയിലുമാണ്​. ഇൗ അവസ്ഥയെ മറികടക്കാനും കേരളത്തി​​​െൻറ അതിജീവനത്തിനുമായി ആദ്യഘട്ടത്തിൽ ബഹ്​റൈനിലെ മലയാളി സംഘടനകളും വ്യക്തികളും ടൺകണക്കിന്​ ആവശ്യസാധനങ്ങളാണ്​ കേരളത്തിലെ ദുരിതാശ്വാസ ക്യാമ്പുകളിലേക്ക്​ കാർ​ഗോ വഴി അയച്ചത്​. സ്​ത്രീകൾക്കും കുട്ടികൾക്കുമുള്ള വസ്​ത്രങ്ങൾ, ഉണങ്ങിയ പഴം, ക​ുട്ടികൾക്കായുള്ള ഭക്ഷണം, പാൽപ്പൊടി, ആവശ്യമരുന്നുകൾ, പുതപ്പ്​, സാനിറ്ററി നാപ്​കിൻ, ടൂത്ത്​ പേസ്​റ്റ്​, ടൂത്ത്​ ബ്രഷ്​, ക്ലീനിങ്​ വസ്​തുക്കൾ തുടങ്ങിയവയാണ്​ നാട്ടിലേക്ക്​ അയച്ചത്​.

ഇവയിൽ ചിലത്​ നാട്ടിൽ എത്തിയിട്ടുണ്ട്​. മറ്റുള്ള സാധനങ്ങൾ വിമാനത്താവളങ്ങളിൽ കംസ്​റ്റംസ്​ ക്ലിയറൻസിനായി കാത്തുകിടക്കുന്നു​. ബഹ്​റൈൻ കേരളീയ സമാജം, സിംസ്​, കെ.സി.എ, കെ.എം.സി.സി, ശ്രീ നാരായണ കൾച്ചറൽ സ​​െൻറർ, ഒ.​െഎ.സി.സി, പ്രതിഭ, ഗുരുദേവ സോഷ്യല്‍ സൊസൈറ്റി (കാനു ഗാര്‍ഡന്‍ തുടങ്ങി നിരവധി സംഘടനകൾ ദുരിതാശ്വാസ പ്രവർത്തനങ്ങളിൽ സജീവമായി മുന്നിലുണ്ട്​. കേരളത്തി​​​െൻറ ദുരിതാശ്വാസ പ്രവർത്തനങ്ങൾക്കായി അടുത്തിടെ രൂപംകൊണ്ട മലയാളി കൂട്ടായ്​മ ​ആവശ്യസാധനങ്ങൾ നാട്ടിലേക്ക്​ അയച്ചിരുന്നു. കഴിഞ്ഞ ദിവസം 1700 കിലോഗ്രാം ആവശ്യസാധനങ്ങൾ കൂടി ശേഖരിച്ചിട്ടുണ്ടെന്നും അവ നാട്ടിലേക്ക്​ ഉടൻ അയക്കുമെന്നും സംഘാടകനായ സിയാദ്​ ഏഴംകുളം ‘ഗൾഫ്​ മാധ്യമ’ത്തോട്​ പറഞ്ഞു. കേരള മുഖ്യമന്ത്രിയുടെ ദുരിതാശ്വാസ ഫണ്ടിലേക്കും ബഹ്​റൈനിൽ നിന്ന്​ സഹായം ലഭിക്കുന്നുണ്ട്​​. പ്രധാന മലയാളി കമ്പനികളുടെ നേതൃത്വത്തിലാണ്​ സഹായധനങ്ങൾ നൽകുന്നത്​.