ആരോഗ്യ മേഖലയില്‍ ബഹ്‌റൈന്‍ മുന്‍നിരയില്‍ –ഹമദ് രാജാവ് 

മനാമ: ആരോഗ്യ സേവന മേഖലയില്‍ ബഹ്‌റൈന്‍ മുന്‍നിരയിലാണെന്ന് രാജാവ് ഹമദ് ബിന്‍ ഈസ ആല്‍ഖലീഫ വ്യക്തമാക്കി. കഴിഞ്ഞ ദിവസം ആരോഗ്യ മന്ത്രി ഫാഇഖ ബിന്‍ത് സഈദ് അസ്സാലിഹി​​െൻറ നേതൃത്വത്തിലെത്തിയ മന്ത്രാലയത്തിലെ ഉന്നത ഉദ്യോഗസ്ഥ സംഘത്തെ സ്വീകരിച്ച് സംസാരിക്കുകയായിരുന്നു അദ്ദേഹം. ആരോഗ്യ സേവന മേഖലയില്‍ മന്ത്രാലയം കൈവരിച്ച നേട്ടങ്ങള്‍ പ്രശംസനീയമാണെന്നും അന്താരാഷ്​ട്ര നിലവാരം പുലർത്തുന്ന ചികിത്സ സൗകര്യങ്ങള്‍ ഒരുക്കുന്നതിലുള്ള ശ്രദ്ധ അഭിമാനകരമാണെന്നും അദ്ദേഹം പറഞ്ഞു. മന്ത്രി ഫാഇഖ ബിന്‍ത് സഈദ് അസ്സാലിഹി​​െൻറ നേതൃത്വത്തിലുള്ള ആരോഗ്യ മന്ത്രാലയ പ്രവര്‍ത്തനങ്ങള്‍ തൃപ്തികരമാണെന്ന് അദ്ദേഹം വിലയിരുത്തി. ചികിത്സ രംഗത്ത് മികച്ച നിലവാരം കാത്തുസൂക്ഷിക്കുന്നതില്‍ ശ്രദ്ധ പുലര്‍ത്തണം. ആരോഗ്യ മേഖലയില്‍ പുരോഗതി കൈവരിക്കുന്നതിനുള്ള നയങ്ങള്‍ നേരത്തെ തന്നെ രാജ്യത്ത് രൂപപ്പെടുത്തിയിരുന്നു. സ്വകാര്യ മേഖലക്കും കാര്യമായ പങ്കാളിത്തം നല്‍കുന്ന രീതിയാണ്​ തുടരുന്നത്​. 

ഒപ്പം ശക്തമായ നിരീക്ഷണവും ഉയര്‍ന്ന മാനദണ്ഡങ്ങളും വഴി  ഗുണനിലവാരം ഉറപ്പുവരുത്താനും ശ്രമിച്ചിട്ടുണ്ട്. ജനങ്ങളുടെ സഹകരണം വിവിധ മേഖലകളിലെ പുരോഗതിയെ സഹായിച്ചിട്ടുണ്ട്​. ആരോഗ്യ സേവന മേഖലയില്‍ കൂടുതല്‍ നേട്ടങ്ങൾ കൈവരിക്കാന്‍ മന്ത്രാലയത്തിന് സാധിക്കട്ടെയെന്ന്​ രാജാവ്​ ആശംസിച്ചു. മന്ത്രാലയത്തി​​െൻറ പ്രവര്‍ത്തനങ്ങള്‍ക്ക് നല്‍കിയ അംഗീകാരത്തിന്​ മന്ത്രി ഹമദ് രാജാവിന് നന്ദി രേഖപ്പെടുത്തി.