ട്രാൻസിറ്റ്​ യാത്രക്കാർക്ക്​ ഹ്രസ്വകാല  താമസ വിസ ഉടൻ ലഭ്യമാക്കും

മനാമ: ബഹ്​റൈനിൽ ഇറങ്ങുന്ന ട്രാൻസിറ്റ്​ വിമാന യാത്രക്കാർക്ക്​ ഹ്രസ്വകാല താമസ വിസ അനുവദിക്കും. ബഹ്​റൈൻ അന്താരാഷ്​ട്ര വിമാനത്താവളത്തിൽനിന്ന്​ കണക്​ഷൻ വിമാനത്തിൽ പോകുന്നവർക്കാണ്​ 72 മണിക്കൂർ കാലാവധിയുള്ള താമസവിസ ലഭ്യമാക്കുക. കൂടുതൽ വിനോദ സഞ്ചാരികളെ രാജ്യത്തേക്ക്​ ആകർഷിക്കുക എന്ന ലക്ഷ്യത്തോടെയാണ്​ നടപടി. ഇൗ വർഷം തന്നെ വിസ അനുവദിച്ച്​ തുടങ്ങും.

താൽക്കാലിക വിസ ലഭ്യമാക്കുന്നത്​ സംബന്ധിച്ച്​ പൗരത്വ-പാസ്​പോർട്ട്​^താമസ കാര്യ വകുപ്പുകളുമായി ബഹ്​റൈൻ വിനോദസഞ്ചാര^പ്രദർശന അതോറിറ്റി (ബി.ടി.ഇ.എ) ഇതിനകം ചർച്ച നടത്തിയിട്ടുണ്ട്​. മൂന്ന്​ ദിവസ കാലാവധിയുള്ള വിസ ഏർപ്പെടുത്തി ട്രാൻസിറ്റ്​ യാത്രക്കാർ ഉൾപ്പെടെയുള്ള വിനോദ സഞ്ചാരികളെ ആകർഷിക്കാനുള്ള നടപടികളാണ്​ സ്വീകരിക്കുന്നതെന്ന്​ ബി.ടി.ഇ.എ ചീഫ്​ എക്​സിക്യൂട്ടീവ്​ ശൈഖ്​ ഖാലിദ്​ ബിൻ ഹുമൂദ്​ ആൽ ഖലീഫ പറഞ്ഞു. യാത്രക്കാർക്ക്​ മൂന്ന്​ ദിവസം ബഹ്​റൈനിൽ തങ്ങുന്നതിനുള്ള ഏറ്റവും മികച്ച മാർഗം ഉറപ്പ്​ വരുത്തുന്നത്​ സംബന്ധിച്ച വിശദാംശങ്ങൾ ചർച്ചചെയ്​ത്​ വരികയാണെന്നും അദ്ദേഹം കൂട്ടി​ച്ചേർത്തു. 67 രാജ്യങ്ങളിലെ പൗരന്മാർക്ക്​ ബഹ്​റൈൻ ഒാൺ അറൈവൽ വിസ അനുവദിക്കുന്നുണ്ട്​. 114 രാജ്യങ്ങളിലെ ജനങ്ങൾക്ക്​ ഒാൺലൈൻ വഴി വിസക്ക്​ അപേക്ഷിക്കാനുള്ള സൗകര്യവുമുണ്ട്​.