ഇന്ത്യ-ബഹ്​റൈൻ എയർ ബബ്​ൾ കരാർ ഏത്​ സമയവും; ഗൾഫ്​ എയർ ഇന്ത്യയിൽനിന്ന്​ ബുക്കിങ്​ തുടങ്ങി

മനാമ: ഇന്ത്യയും ബഹ്​റൈനും തമ്മിൽ എയർ ബബ്​ൾ കരാർ ഏതുസമയവും പ്രാബല്യത്തിൽ വരാനിരിക്കേ, ഗൾഫ്​ എയർ ഇന്ത്യയിൽനിന്ന്​ ബുക്കിങ്​ തുടങ്ങി. സെപ്​റ്റംബർ എട്ട്​ മുതലാണ്​ സർവീസ്​ നിശ്​ചയിച്ചിരിക്കുന്നത്​​. ട്രാവൽ ഏജൻസികൾ മുഖേനയും വെബ്​സൈറ്റ്​ വഴിയുമാണ്​ ബുക്കിങ്​.

കേരളത്തിൽനിന്ന്​ തിരുവനന്തപുരം, കൊച്ചി, കോഴിക്കോട്​ എന്നിവിടങ്ങളിൽനിന്നാണ്​ സർവീസ്​. കോഴിക്കോടുനിന്നുള്ള വിമാനത്തിലേക്ക്​ മുഴുവൻ സീറ്റും ഇതിനകം തന്നെ ബുക്ക്​ ചെയ്​തുകഴിഞ്ഞു. തുടർന്നുള്ള ദിവസങ്ങളിലേക്കും ബുക്കിങ്​ തുടങ്ങിയിട്ടുണ്ട്​.

കോഴിക്കോട്​ നിന്ന്​ 204 ദിനാറാണ്​ നിരക്ക്​. തിരുവനന്തപുരത്തുനിന്ന്​ 213 ദിനാറും കൊച്ചിയിൽനിന്ന്​ 180.500 ദിനാറുമാണ്​ നിരക്ക്​. കേരളത്തിന്​ പുറമേ, ഇന്ത്യയിലെ വിവിധ വിമാനത്താവളങ്ങളിൽനിന്നും ബുക്കിങ്​ തുടങ്ങിയിട്ടുണ്ട്​.

എയർ ബബ്​ൾ കരാർ ഏതുസമയവും പ്രതീക്ഷിക്കാമെന്നാണ്​ ഇന്ത്യൻ അംബാസഡർ കഴിഞ്ഞ ദിവസവും സൂചിപ്പിച്ചത്​. ഇരുരാജ്യങ്ങളും തമ്മിൽ ഇതിനായി ദ്രുതഗതിയിലുള്ള ചർച്ചകൾ പുരോഗമിക്കുകയാണ്​. സന്ദർശക വിസ ഉൾപ്പെടെ ബഹ്​റൈനിൽ സാധുവായ ഏത്​ വിസയുള്ളവർക്കും വരാൻ കഴിയുമെന്നതാണ്​ എയർ ബബ്​ൾ കരാറി​െൻറ പ്രത്യേകത. വിസയുടെ കാലാവധി കഴിയാറായ നിരവധി പേരാണ്​ നാട്ടിൽ കുടുങ്ങിക്കിടക്കുന്നത്​. ഇവരെല്ലാം എയർ ബബ്​ൾ കരാറിനായി ആകാംക്ഷയോടെ കാത്തിരിക്കുകയാണ്​. ​