ഭിന്നശേഷിക്കാർക്ക് വിവിധ പദ്ധതികളുമായി അതിർത്തി രക്ഷാസേന

യാമ്പു: ശാരീരിക വെല്ലുവിളികൾ നേരിടുന്ന സ്വദേശി പൗരന്മാർക്കായി വിവിധ പദ്ധതികളുമായി യാമ്പു അതിർത്തി രക്ഷാസേന. ഭിന്നശേഷിക്കാരായ ആളുകളെ പൊതു ഇടങ്ങളിൽ എത്തിക്കാനും സാധ്യമാകുന്ന മേഖലയിൽ തൊഴിലെടുത്ത് ജീവിക്കാൻ പ്രാപ്‌തരാക്കാനും വേണ്ട പരിശീലനവും പ്രോത്സാഹനവും നൽകുന്നതിനായാണ്​ വിവിധ പരിപാടികൾ ആസൂത്രണം ചെയ്​തിരിക്കുന്നത്.

ഷറം ബീച്ചിലെ പ്രത്യേക മേഖലയിൽ സംഘടിപ്പിച്ച പരിശീലന പരിപാടിയിൽ വിവിധ സംവിധാനങ്ങളൊരുക്കി ഭിന്നശേഷിക്കാർക്ക് നീന്തൽ പരിശീലനം വരെ നൽകി. വിഷൻ 2030​​െൻറ ഭാഗമായ വിവിധ പദ്ധതികളുടെ തുടർച്ചയാണ് ഇതെന്ന് ബന്ധപ്പെട്ടവർ പറഞ്ഞു. യാമ്പു ഗവർണർ സഅദ് ബിൻ മർസൂഖ് അസ്സുഹമി പരിപാടി ഉദ്‌ഘാടനം ചെയ്തു. മദീന മേഖല അതിർത്തി രക്ഷാസേന മേധാവി കേണൽ ബഷീർ ബിൻ മുഫ്‌ലിഹ് അൽബലവി ചടങ്ങിൽ അധ്യക്ഷത വഹിച്ചു.