വിമാനം പോയി; കോഴിക്കോട്​ സ്വദേശി ഭക്ഷണമില്ലാതെ  രണ്ടുനാൾ വിമാനത്താവളത്തിൽ 

മനാമ: ബോഡിംങ്​ പാസ്​ എടുത്തശേഷം യഥാസമയം വിമാനത്തിൽ കയറാൻ കഴിയാത്ത കാരണം മലയാളി അനുഭവിച്ചത്​ രണ്ടുനാളത്തെ തീരാദുരിതം.
 തുടർന്ന്​ വീണ്ടും ടിക്കറ്റ്​ എടുക്കാനോ ഭക്ഷണം കഴിക്കാനോ പണമില്ലാതെ  ബഹ്​റൈൻ വിമാനത്താവളത്തിൽ കുടുങ്ങിയ കോഴിക്കോട്​ പയ്യോളി സ്വദേശി യൂസഫിനാണ്​ ബുദ്ധിമുട്ട്​ നേരിട്ടത്​. ഇന്ത്യൻ സ്വകാര്യ വിമാനകമ്പനിയിൽ  ആഗസ്​റ്റ്​ 27 ന്​ രാത്രിയാണ്​ ഇദ്ദേഹം കോഴിക്കോടേക്ക്​ ടിക്കറ്റ്​ എടുത്തത്​. വിമാനം പുറപ്പെട്ടതറിഞ്ഞ്​ ഇദ്ദേഹം വിമാനകമ്പനിയുടെ കൗണ്ടറിൽ  പരാതിപ്പെട്ടപ്പോൾ, നിരവധി പ്രാവശ്യം പേര്​ ​ അനൗൺസ്​മ​​െൻറ്​ ചെയ്​തിരുന്നതായും ആളെ കാണാത്തതിനാൽ വിമാനം ​പ​ുറപ്പെട്ടതാണെന്നും  മറുപടി ലഭിച്ചു.

 25 വർഷം ബഹ്​റൈനിൽ പ്രവാസ ജീവിതം നയിച്ച യൂസഫ്​ വിസ റദ്ദാക്കിയായിരുന്നു നാട്ടിലേക്ക്​ പോകാൻ എത്തിയത്​. കൈയിൽ പണം കരുതിയിട്ടില്ലെന്നും തനിക്ക്​ ഭക്ഷണം പോലും കഴിക്കാനോ ടിക്കറ്റ്​ വീണ്ടും എടുക്കാനോ കഴിയാത്ത അവസ്ഥയാണെന്ന്​ താൻ വിമാന കമ്പനി ജീവനക്കാരോട്​ പറഞ്ഞുവെങ്കിലും മറുപടി ലഭിച്ചില്ലെന്ന്​ യൂസഫ്​ പറയുന്നു. തുടർന്ന്​ ഇന്നലെ വിവരം അറിഞ്ഞെത്തിയ യൂസഫി​​​െൻറ ബന്​ധു ഇതേ വിമാനകമ്പനിയിൽ   പണം അടച്ചപ്രകാരം,  ഇന്നലെ രാത്രിയിൽ പുറപ്പെട​ുന്ന മുംബൈ കണക്ഷൻ  ഫ്ലൈറ്റിൽ ഇദ്ദേഹത്തിന്​ ടിക്കറ്റ്​ നൽകി. എന്നാൽ മുംബൈയിൽ നിന്ന്​ മറ്റന്നാളാണ്​ കോഴിക്കോടേക്ക്​ അടുത്ത ഫ്ലൈറ്റുള്ളത്​. അതിനാൽ യൂസഫ്​ നാട്ടിലെത്താൻ ഇനിയും ദിവസങ്ങൾ പിടിക്കുമെന്ന അവസ്ഥയിലാണ്​.