ഫ്ലെക്​സിബിൾ  വർക്​ പെർമിറ്റ്​ ഉടൻ

മനാമ: ലേബർ മാർക്കറ്റ്​ റെഗുലേറ്റി അതോറിറ്റി (എൽ.എം.ആർ.എ) പ്രവാസി തൊഴിലാളികൾക്കായി രണ്ടുതരം ഫ്ലെക്​സിബിൾ വർക്​ പെർമിറ്റ്​ അനുവദിച്ചുതുടങ്ങുമെന്ന്​ ചീഫ്​ എക്​സിക്യൂട്ടിവ്​ ഒാഫിസർ ഉസാമ ബിൻ അബ്​ദുല്ല അൽ അബ്​സി വ്യക്​തമാക്കി.ഇന്ത്യൻ അംബാസഡർ അലോക്​ കുമാർ സിൻഹയുമായി സംസാരിക്കുകയായിരുന്നു അദ്ദേഹം. പ്രതിമാസം 2000 ഫ്ലക്​സി വർക്​ പെർമിറ്റുകളും ഹോസ്​പിറ്റാലിറ്റി വർക്​ പെർമിറ്റുകളുമാണ്​ അനുവദിക്കു​കയെന്ന്​ ദേശീയ മനുഷ്യക്കടത്ത്​ വിരുദ്ധ സമിതി അധ്യക്ഷൻ കൂടിയായ അൽ അബ്​സി വ്യക്​തമാക്കി. രണ്ടുവർഷത്തേക്കാണ്​ ഇത്​ അനുവദിക്കുക.റെസ്​റ്റോറൻറുകൾ, ഹോട്ടലുകൾ, സലൂണുകൾ എന്നിവിടങ്ങളിൽ ജോലി ചെയ്യുന്ന പ്രത്യേക മെഡിക്കൽ ടെസ്​റ്റിന്​ വിധേയരാകേണ്ടവർക്കാണ്​ ഹോസ്​പിറ്റാലിറ്റി ​ഫ്ലെക്​സി വർക്​ പെർമിറ്റ്​ അനുവദിക്കുക. ഫ്ലെക്​സി പദ്ധതിക്കുള്ളിൽ വരുന്നവർക്ക്​ പ്രത്യേക കാർഡ്​ അനുവദിക്കും. ഇതിൽ തൊഴിലാളിയുടെ ഫോ​േട്ടാ,ഏത്​ തരം പെർമിറ്റ്​, അതി​​െൻറ കാലാവധി തുടങ്ങിയ കാര്യങ്ങളുണ്ടാകും. 

പ്രവാസി തൊഴിലാളികളുടെ അവകാശ സംരക്ഷണത്തിനായി ആവുന്നതെല്ലാം ചെയ്യുമെന്ന്​ അൽ അബ്​സി വ്യക്​തമാക്കി.തൊഴിലന്തരീക്ഷം മെച്ചപ്പെടുത്താനായി നിരവധി നടപടികൾ പോയ കാലങ്ങളിൽ സ്വീകരിച്ചിട്ടുണ്ട്​. ​പ്രവാസികളെ ചൂഷണത്തിൽ നിന്നും മനുഷ്യക്കടത്തിൽ നിന്നും സംരക്ഷിക്കാനുള്ള ശ്രമങ്ങളിൽ ഇന്ത്യൻ എംബസിയുടെ സഹകരണം ഉസാമ അഭ്യർഥിച്ചു.   പ്രവാസി ക്ഷേമത്തിനായി ബഹ്​റൈൻ സ്വീകരിച്ചുവരുന്ന നടപടികൾ ആശാവഹമാണെന്ന്​ അംബാസഡർ പറഞ്ഞു. ബഹ്​റൈനിൽ ഇന്ത്യൻ പ്രവാസികൾ എല്ലാ അവകാശങ്ങളും അനുഭവിക്കുന്നവരാണെന്ന്​ അദ്ദേഹം കൂട്ടിച്ചേർത്തു.

എൽ.എം.ആർ.എയും ഇതര സർക്കാർ സംവിധാനങ്ങളുമായി എംബസി പൂർണമായി സഹകരിക്കും. ​ഫ്ലെക്​സി വർക്​ പെർമിറ്റ്​ വരുന്ന സാഹചര്യത്തിൽ എല്ലാ അനധികൃത ഇന്ത്യൻ തൊഴിലാളികളും ഇതി​​െൻറ ആനുകൂല്യം ഉപയോഗപ്പെടുത്തി നിയമപരമായി ബഹ്​റൈനിൽ തങ്ങാൻ തയാറാകണമെന്ന്​ അദ്ദേഹം കൂട്ടിച്ചേർത്തു.  ഏറ്റവും പുതിയ കണക്കനുസരിച്ച്​, ബഹ്​റൈനിലെ ഏറ്റവും വലിയ പ്രവാസി സമൂഹം ഇന്ത്യക്കാരാണ്​. 313,000 ഇന്ത്യക്കാരാണ്​ ഇവിടെയുള്ളത്​. ഇതിൽ 219,000 പേർ തൊഴിലാളികളാണ്​. 66,000 പേർ വീട്ടുജോലിക്കാരും 2500പേർ നിക്ഷേപകരും 63,000 പേർ ആശ്രിത വിസയിലുള്ളവരുമാണ്​.