തീപിടിത്തം പതിവാകുന്നു  ശക്​തമായ നടപടി വേണമെന്ന്​ ആവശ്യം

മനാമ: തൊഴിലാളികൾ തിങ്ങി താമസിക്കുന്ന ഇടങ്ങളിലെ അഗ്​നിബാധ ഒഴിവാക്കാൻ അടിയന്തര നടപടി വേണമെന്ന്​ ആവശ്യം. കഴിഞ്ഞ ദിവസം മുഹറഖിലെ അനധികൃത ലേബർ ക്യാമ്പിലുണ്ടായ തീപിടിത്തത്തിൽ മൂന്ന്​ ബംഗ്ലാദേശ്​ പൗരൻമാർക്കാണ്​ ജീവൻ നഷ്​ടമായത്​. ഇൗ സംഭവത്തിൽ അന്വേഷണം നടക്കുകയാണ്​. റഫ്രിജറേറ്ററിലെ ഷോർട്​ സർക്യൂട്​ മൂലമാണ്​ അഗ്​നിബാധയുണ്ടായത്​ എന്നാണ്​ പ്രാഥമിക നിഗമനം. ഇത്തരം സംഭവങ്ങൾ ആഭ്യന്തര മന്ത്രാലയത്തിന്​ നേരിട്ട്​ റിപ്പോർട്ട്​ ചെയ്യേണ്ടത്​ ഗവർണർമാരാണെന്ന്​ കാപിറ്റൽ ട്രസ്​റ്റീസ്​ ബോർഡ്​ ആക്​ടിങ്​ ചെയർമാൻ മാസിൻ അൽ ഉംറാൻ പ്രാദേശിക പത്രത്തോട്​ പറഞ്ഞു. അഗ്​നിബാധ പലയിടത്തും സ്​ഥിരമായി റിപ്പോർട്ട്​ ചെയ്യപ്പെടുന്ന സാഹചര്യത്തിൽ ഇത്​ തടയാൻ കൂട്ടായ പ്രവർത്തനം വേണമെന്നും അദ്ദേഹം പറഞ്ഞു. ഇക്കാര്യം ചർച്ച ചെയ്യാൻ നാല്​ ഗവർണറേറ്റി​​െൻറയും സംയുക്​ത സമിതി രൂപവത്​കരിക്കണമെന്നും അദ്ദേഹം നിർദേശിച്ചു. 
ഇൗ വർഷം ഇതേ വരെ രാജ്യത്ത്​ 37 തീപിടിത്തങ്ങളാണ്​ റിപ്പോർട്ട്​ ചെയ്യപ്പെട്ടിട്ടുള്ളത്​. ഇതിൽ മിക്കതിനും കാരണമാകുന്നത്​ ഷോർട്​ സർക്യൂട്​ ആണ്​. മോശം വയറിങ്ങും ഇലക്​ട്രിക്​ വയറിലേക്ക്​ വെള്ളം വീഴുന്നതും മറ്റുമാണ്​ ഇതിന്​ കാരണം. 
  ഇൗ കാര്യത്തിൽ മതിയായ ബോധവത്​കരണം നടത്തേണ്ടതുണ്ടെന്ന്​ അൽ ഉംറാൻ വ്യക്​തമാക്കി. ഇതിൽ മാധ്യമങ്ങളും എംബസികളും പൊതുസമൂഹവും പങ്കാളികളാകണം. പ്രവാസി തൊഴിലാളികൾ തിങ്ങിതാമസിക്കുന്ന സ്​ഥലങ്ങളിലാണ്​ മിക്കവാറും തീപിടിത്തങ്ങൾ റിപ്പോർട്ട്​ ചെയ്​തിട്ടുള്ളത്​. 
വൈദ്യുതി ഉപകരണങ്ങൾ അലസമായി ഉപയോഗിക്കുന്നതുണ്ടാക്കുന്ന അപടങ്ങളെക്ക​ുറിച്ച്​ വ്യത്യസ്​ത ഭാഷകളിൽ ബോധവത്​കരണം ആവശ്യമായി വരും. തൊഴിലാളികളെ കൂട്ടമായി അപകട സാധ്യതയുള്ള കെട്ടിടങ്ങളിൽ താമസിപ്പിക്കുന്ന തൊഴിലുടമകൾക്കെതിരെയും, ഇങ്ങനെയുള്ള ​ആവശ്യത്തിനായി കെട്ടിടം വാടകക്ക്​ നൽകുന്നവർക്കെതിരെയും നടപടി വേണമെന്നും അദ്ദേഹം കൂട്ടിച്ചേർത്തു.