മന്നം ബാലകലോത്സവം ‘മന്ദാരപൂക്കൾ ഫിനാലെ’ ശ്രദ്ധേയമായി

മനാമ: ബഹ്​റൈൻ കേരള സോഷ്യൽ ആൻറ്​ കൾച്ചറൽ അസോസിയേഷൻ സംഘടിപ്പിച്ച മന്നം ബാലകലോത്സവം  ‘മന്ദാരപൂക്കൾ ഫിനാലെ’ ശ്രദ്ധേയമായി. 
ഗാനരചയിതാവ്‌ വയലാർ ശരത്ചന്ദ്ര വർമ്മ മുഖ്യാതിഥിയായിരുന്നു. പ്രപഞ്ച പരിണാമത്തെ ഇതിഹാസത്തി​​​െൻറ അടിസ്ഥാനത്തിൽ അദ്ദേഹം വിലയിരുത്തി. 
അമ്മയാണു മഹാസത്യമെന്നും, അമ്മമാർ ഉറങ്ങിപോകുന്നതുകൊണ്ടാണ്‌ ചക്രവ്യൂഹങ്ങളിൽ മക്കൾ അകപെട്ടുപോകുന്നതെന്നുംവയലാർ ശരത്ചന്ദ്ര വർമ്മ അഭിപ്രായപെട്ടു. കേരള സോഷ്യൽ ആൻറ്​ കൾച്ചറൽ അസോസിയേഷൻ പ്രസിഡൻറ്​ പമ്പാവാസൻ നായർ അധ്യക്ഷനായിരുന്നു.

യോഗത്തിൽ ജനറൽ സെക്രട്ടറി മനോജ്​കുമാർ സ്വാഗതം ആശംസിച്ചു. ഇന്ത്യൻ സ്​കൂൾ ചെയർമാൻ  പ്രിൻസ്‌ നടരാജൻ, സാഹിത്യ വിഭാഗം സെക്രട്ടറി മനു മോഹനൻ, കലാവിഭാഗം സെക്രട്ടറി സന്തോഷ്‌ കയറാട്ട്​, ബാലകലോത്സവം കൺവീനർ സതീഷ്‌ നാരായണൻ എന്നിവർ യോഗത്തിൽ പങ്കെടുത്തു സംസാരിച്ചു. 
കലാ സാമൂഹിക സാംസ്​കാരിക രംഗത്തെ പ്രമുഖർ യോഗത്തിൽ പങ്കെടുത്തു. മന്നം ബാലകോത്സവം മന്ദാരപൂക്കൾ കലാതിലകം അനഘ എസ്‌ ലാൽ , കലാപ്രതിഭ  ശൗര്യ ശ്രീജിത്ത്‌, ഗ്രൂപ്പ്‌ചാമ്പ്യൻന്മാരായ അതുൽ കൃഷ്​ണൻ , ആദിശ്രീ സോണി , അക്ഷയ പിള്ള , വേദിക സുരേഷ്‌ എന്നിവരെയും വേദിയിൽ ആദരിച്ചു. സംസ്​കൃത രത്നമായി മാധവ്‌ ഹരീഷും, സാഹിത്യ രത്നമായി സാധിക മുരളീധരനും.

സംഗീത രത്നമായി ശ്രീദക്ഷയും, നാട്യരത്നമായി അൻസു സുജിയും ആദരിക്കപ്പെട്ടു. പ്രഥമ കെ.എസ്​.സി.എ മലയാള കവിതാ പുരസ്​കാരം  ആദർശ് മാധവൻകുട്ടിക്ക്‌ നൽകി ആദരിച്ചു. കവിതാ മത്സരത്തിൽ രണ്ടാം സ്ഥാനം നേടിയ സിബി ഇലവുപാലം, മൂന്നാം സ്ഥാനം നേടിയ മനുകാരയാട്‌, ജൂറി പരാമർശം നേടിയ  മായാ കിരൺ, ഡോ. ജിഷ ജ്യോതിസ്‌ എന്നിവർക്കും പുരസ്​കാരം നൽകി ആദരിച്ചു. വേദിയിൽ കലാത്സവ പ്രതിഭകളുടെ കലാപരിപാടികളും അരങ്ങേറി. നാനൂറിൽപരം കുട്ടികളാണു  മന്ദാരപൂക്കൾ  മന്നം ബാലകലോത്സവത്തിൽ പങ്കെടുത്തത്‌.