ആരോഗ്യ ദിന പരിപാടികൾ സംഘടിപ്പിച്ചു

മനാമ: ലോക ആരോഗ്യദിനത്തി​​​​െൻറ ഭാഗമായി കഴിഞ്ഞ ദിവസം, ആരോഗ്യ മന്ത്രാലയം രാജ്യത്ത്​ ആരോഗ്യ പരിപാടികൾ സംഘടിപ്പിച്ചു. സുപ്രീം ഹെൽത്ത് കൗൺസിൽ പ്രസിഡൻറ്​ ലെഫ്റ്റനൻറ്​ ജനറൽ ശൈഖ് മുഹമ്മദ് ബിൻ അബ്​ദുല്ല അൽ ഖലീഫയുടെ നേതൃത്വത്തിൽ ആലി ഷോപ്പിംഗ് കോംപ്ലക്​സിലാണ് പരിപാടി നടന്നത്. മന്ത്രി ഫാഇഖ ബിന്‍ത് സഈദ് അസ്സാലിഹ്, ആരോഗ്യ മന്ത്രാലയത്തിലെ മുതിർന്ന ഉദ്യോഗസ്ഥർ,  ജീവനക്കാർ  എന്നിവർ ആഘോഷങ്ങളിൽ പങ്കെടുത്തു. എല്ലാവർക്കും ആരോഗ്യം എന്ന ശീർഷകത്തിലാണ്​ ഇൗ വർഷത്തെ ആരോഗ്യദിന പരിപാടികൾ നടന്നത്​. ബഹ്​ഹൈനിൽ ആരോഗ്യ സംരക്ഷണത്തിനായി വ്യാപക പരിപാടികളാണ്​ നടക്കുന്നതെന്ന്​ ആരോഗ്യമന്ത്രി പറഞ്ഞു.

ആരോഗ്യ സംവിധാനത്തെ പരിഷ്​കരിക്കുന്നതിനും ഏറ്റവും മികച്ച അന്താരാഷ്​ട്ര നിലവാരം പുലർത്തുന്നതിനും എല്ലാ ജനങ്ങൾക്കും സുസ്ഥിരവും  സമഗ്രവുമായ ആരോഗ്യ പരിരക്ഷ ഉറപ്പാക്കുന്നതിനും  സുപ്രീം ഹെൽത്ത് കൗൺസലുമായി ബഹ്റൈൻ ആരോഗ്യമന്ത്രാലയം സഹകരിച്ച്​ മുന്നോട്ടുപോകുകയാണെന്നും മന്ത്രി വ്യക്തമാക്കി. ആരോഗ്യത്തി​​​െൻറ പ്രാധാന്യം അടിവരയിടുന്ന പ്രവർത്തനങ്ങൾ സംഘടിപ്പിക്കുന്ന ആരോഗ്യ സുപ്രീം കൗൺസിൽ  പ്രസിഡൻറിന്​ മന്ത്രി ചടങ്ങിൽ നന്ദി അറിയിക്കുകയും ചെയ്​തു.  2018 ലെ ലോക ആരോഗ്യ ദിനം പ്രമേയത്തി​​​െൻറ പ്രാധാന്യങ്ങൾക്ക്​ അനുസൃതമായും ലോകമെമ്പാടുമുള്ള ആരോഗ്യ സംവിധാനങ്ങളുടെ പ്രധാന  ലക്ഷ്യവും മുന്നിൽവെച്ചാണ്​ ബഹ്റൈനിൽ ആരോഗ്യ മന്ത്രാലയവും സുപ്രീം ഹെൽത്ത് കൌൺസിലും മറ്റ് കഴിവുള്ള പാർടികളും പ്രവർത്തിക്കുന്നതെന്നും മന്ത്രി പറഞ്ഞു. 

ആരോഗ്യ, സാമൂഹിക ക്ഷേമ ഡയറക്​ടേറ്റുകളുടെയും ആൻറി നാർക്വാട്ടിക്​ ഡയറക്​ടേറ്റുകളുടെയും നേതൃത്വത്തിൽ ലോക ആരോഗ്യദിനാഘോഷം സംഘടിപ്പിച്ചു.  സുപ്രീം കൗൺസിൽ ഒാഫ്​ ഹെൽത്​ പ്രസിഡൻറ്​ ലഫ്​ ജനറൽ ​ഡോ.ശൈഖ്​ മുഹമ്മദ്​ ബിൻ അബ്​ദുല്ല ആൽ ഖലീഫയുടെ രക്ഷാധികാരത്തിലാണ്​ ആഘോഷം പരിപാടി നടക്കുന്നത്​. ആരോഗ്യം സംരക്ഷിക്കാനും ലഹരിക്കെതിരെയുള്ള പോരാട്ടം നടത്താനും ലക്ഷ്യമിട്ടാണ്​ ആഘോഷം നടത്തിയത്​.