നാടെങ്ങും ആഹ്ലാദപ്പെരുന്നാൾ

മനാമ: ആത്​മവിശുദ്ധീകരണത്തി​െന്‍റ റമദാൻ മാസത്തിനൊടുവിൽ ആഗതമായ ചെറിയ പെരുന്നാൾ വിശ്വാസികൾ അത്യാഹ്ലാദപൂർവ്വം ആഘോഷിച്ചു. വിവിധ സ്ഥലങ്ങളിൽ ഒരുക്കിയ ഈദ്​ ഗാഹുകളിൽ ആയിരങ്ങൾ പെരുന്നാൾ നമസ്കാരത്തിനായി ഒത്തു​ചേർന്നു. രാജാവ്​ ഹമദ്​ ബിൻ ഈസ ആൽ ഖലീഫയും കിരീടാവകാശിയും പ്രധാനമ​ന്ത്രിയുമായ പ്രിൻസ്​ സൽമാൻ ബിൻ ഹമദ്​ ആൽ ഖലീഫയും സഖീർ പാലസ്​ പള്ളിയിൽ പെരുന്നാൾ നമസ്കാരം നിർവഹിച്ചു.

രണ്ട്​ വർഷത്തെ ഇടവേളക്കുശേഷം കോവിഡ്​ നിയന്ത്രണങ്ങൾ ഇല്ലാത്ത പെരുന്നാൾ ആഘോഷങ്ങളിൽ പങ്കുചേരാൻ കഴിഞ്ഞതി​െന്‍റ സന്തോഷത്തിലായിരുന്നു വിശ്വാസികൾ.

ബന്ധങ്ങളും സൗഹൃദങ്ങളും പുതുക്കാനും ഊട്ടിയുറപ്പിക്കാനുമുള്ള വേദി കൂടിയായിരുന്നു പെരുന്നാൾ സുദിനം. നമസ്കാരത്തിനുശേഷം പരസ്​പരം ആലിംഗനം ചെയ്തും ഈദ്​ ആശംസകൾ കൈമാറിയും പെരുന്നാൾ സന്തോഷം പങ്കുവെച്ചു.

പൊതുവായ ഈദ്​ ഗാഹുകൾക്ക്​ പുറമേ, വിവിധ സ്​കൂളുകളും ​ക്ലബുകളും കേന്ദ്രീകരിച്ച്​ പ്രവാസി സമൂഹത്തിന്​ ​പ്രത്യേക ഈദ്​ ഗാഹുകൾക്കും അംഗീകാരം നൽകിയിരുന്നു. ഹൂറ ഉമ്മു​ ഐമൻ സ്​കൂൾ, ഗുദൈബിയ അബ്​ദുറഹ്​മാൻ അദ്ദാഖിൽ സ്​കൂൾ, ഈസ്​റ്റ്​ റിഫ ബോയ്​സ്​ സ്​കൂൾ, ഉമ്മുൽ ഹസം ക്ലബ്​, മാലികിയ്യ സ്​കൂൾ ഫോർ ബോയ്​സ്​, ഇന്ത്യൻ സ്​കൂൾ ഈസ ടൗൺ, ഹമദ്​ ടൗൺ യൂത്ത്​ സെന്‍റർ, സിത്ര ഹാലത്​ ഉമ്മുൽ ബൈദ്​ പള്ളിക്ക്​ എതിർവശമുള്ള ഗ്രൗണ്ട്​ എന്നിവിടങ്ങളിലാണ്​ പ്രവാസി സമൂഹത്തിനായി ഈദ്​ ഗാഹുകൾ സംഘടിപ്പിച്ചു.

രാജ്യത്തെ പ്രധാന വിനോദ സഞ്ചാര കേന്ദ്രങ്ങളിൽ പെരുന്നാൾ ആഘോഷത്തിന്​ നൂറുകണക്കിനാളുകൾ എത്തിയിരുന്നു. വീടുകളിൽ സു​ഹൃത്തുക്കൾക്കും ബന്ധുക്കൾക്കുമായി വിഭവ സമൃദ്ധമായ ഭക്ഷണം ഒരുക്കി​യും സന്തോഷം പങ്കിട്ടു.

മഹാമാരിയുടെ കെടുതികൾക്കൊടുവിൽ പുതുപ്രതീക്ഷകൾ സമ്മാനിച്ച്​ കടന്നുവന്ന ചെറിയ പെരുന്നാൾ വിവിധ മതസ്ഥരുടെ സംഗമത്തിനും വേദിയായി.