സാഹോദര്യത്തി​െന്‍റ സുദിനം

പരിത്യാഗത്തി​െന്‍റയും കാരുണ്യത്തി​​െന്‍റയും നോമ്പുകാലത്തിനൊടുവിൽ ആഹ്ലാദത്തി​െന്‍റ ചെറിയ പെരുന്നാൾ ആഗതമായി.

സ്​നേഹവും സാഹോദര്യവും ഊട്ടിയുറപ്പിക്കുന്ന സുന്ദര മുഹൂർത്തമാണ് ഈ സുദിനം. മനസിലെ നന്മയെ തേച്ചുമിനുക്കിയെടുത്ത റമദാൻ കാലം നൽകിയ പുതു ഉണർവ്വോടെയാണ്​ വിശ്വാസികൾ ചെറിയ പെരുന്നാളിനെ വരവേൽക്കുന്നത്​.

മനുഷ്യരെ പരസ്പരം ബന്ധിപ്പിക്കുന്ന സ്​നേഹ നിലാവായി ശവ്വാൽ അമ്പിളി മാനത്ത്​ തെളിഞ്ഞപ്പോൾ മനസ്സുകളിൽ വിരിഞ്ഞ ആഹ്ലാദം പറഞ്ഞറിയിക്കാൻ കഴിയാത്തതാണ്​. പരസ്പരം ആലിംഗനം ചെയ്തും ആശംസകൾ കൈമാറിയും ചെറിയ പെരുന്നാളി​െൻറ സന്തോഷം ഏവരും പങ്കുവെക്കുന്നു. മതത്തിനും ദേശത്തിനും അതീതമായ ഐക്യപ്പെലി​​​െന്‍റ സന്ദേശമാണ്​ ഈ ദിനം നമുക്ക്​ നൽകുന്നത്​.

കോവിഡ്​ മഹാമാരി സൃഷ്ടിച്ച ഏകാന്തതയിലും ഒറ്റപ്പെടലിലുംപ്രയാസപ്പെട്ട മനുഷ്യർക്ക്​ റമദാനിലെ ഇഫ്താർ കൂട്ടായ്മകൾ ആശ്വാസമായിരുന്നു. രണ്ട്​ വർഷത്തെ ഇടവേളക്കുശേഷം എത്തിയ ഈ സംഗമങ്ങൾ പരസ്പരം ചേർത്തുപിടിക്കാനും ആശ്വസിപ്പിക്കാനും ഹൃദയ വികാരങ്ങൾ പങ്കുവെക്കാനും വേദിയൊരുക്കി. അതിജീവനത്തി​െന്‍റ പാതയിൽ കരുത്തോടെ മുന്നോട്ട്​ പോകുവാൻ ഇഫ്​താർ സംഗമങ്ങൾ നൽകിയ ഊർജം ചെറുതല്ല. ആരും ഒറ്റപ്പെടില്ല എന്ന ആത്​മവിശ്വാസം ഊട്ടിയുറപ്പിക്കാൻ ഈ കൂട്ടായ്​മകൾക്ക്​ കഴിഞ്ഞു.

ലോകമെങ്ങുമുള്ള മനുഷ്യർക്കൊപ്പം ഗൾഫിലും അത്യാഹ്ലാദത്തോടെ ചെറിയ പെരുന്നാൾ ആഘോഷിക്കുകയാണ്. സ്വ​ദേശികൾക്കൊപ്പം പ്രവാസികളെയും കരുതലോടെ കാത്തുസംരക്ഷിക്കുന്ന രാജാവ്​ ഹമദ്​ ബിൻ ഈസ ആൽ ഖലീഫക്കും കിരീടാവകാശിയും പ്രധാനമന്ത്രിയുമായ പ്രിൻസ്​ സൽമാൻ ബിൻ ഹമദ്​ ആൽ ഖലീഫക്കും ബഹ്​റൈൻ സർക്കാരിനും ജനങ്ങൾക്കും ഈദുൽ ഫിത്വ്​ർ ആശംസകൾ നേരുന്നു.

ഐക്യത്തോടെയും സ്നേഹത്തോടെയും മുന്നോട്ട്​ പോകുവാൻ ഈ ചെറിയ പെരുന്നാൾ നമ്മെ അനുഗ്രഹിക്കട്ടെ.