​െഎ.വൈ.സി.സി ദുരിതാശ്വാസ സാധനങ്ങൾ കൈമാറി

മനാമ: ഇന്ത്യൻ യൂത്ത് കൾച്ചറൽ കോൺഗ്രസ് പ്രവർത്തകർ കേരളത്തിലെ ദുരിതബാധിതരെ സഹായിക്കാനായി സ്വരൂപിച്ചയച്ച 3000 കിലോയോളം സാധനങ്ങൾ തിരുവന്തപുരം ജില്ലാ കളക്​ടർ കെ. വാസുകിക്ക് കൈമാറി. ബഹ്​റൈനിൽ നിന്ന് കയറ്റിയയച്ച് കെട്ടിക്കിടക്കുകയായിരുന്ന സാധനങ്ങൾ ഐ.വൈ.സി.സി വൈസ് പ്രസിഡൻറ്​ റിച്ചി കളത്തൂരേത്ത് നേരിട്ട് നാട്ടിൽ ചെന്ന് അധികാരികളെ കൊണ്ട് ആവശ്യമായ ഇടപെടലുകൾ നടത്തിയാണ്​ സാധനങ്ങൾ കളക്​ടർക്ക്​ കൈമാറിയതെന്ന്​ ഐ.വൈ.സി.സി ഭാരവാഹികൾ പറഞ്ഞു.

പുതിയ വസ്​ത്രങ്ങളും സാനിട്ടറി നാപ്​കിനുകളും ഉൾപ്പെടെ ബഹ്​റൈനിലെ
സാധാരണക്കാർ നൽകിയ 125 കാർട്ടൺ സാധനങ്ങളാണ്​ കേരളത്തിലേക്ക്​ എത്തിച്ചതെന്നും ഇതുമായി സഹകരിച്ച എല്ലാ സുമനസുകൾക്കും നന്ദി പറയുന്നതായും ഐ.വൈ.സി.സി പ്രസിഡൻറ്​ ബേസിൽ നെല്ലിമറ്റം, സെക്രട്ടറി ഫാസിൽ വട്ടോളി, ട്രഷറർ ഹരി ഭാസ്​കരൻ എന്നിവർ അറിയിച്ചു.