മൃതദേഹം നാട്ടിലെത്തിക്കൽ:  48 മണിക്കൂർ മുമ്പ്​ രേഖകൾ എത്തിക്കണമെന്ന ഉത്തരവ്​ പിൻവലിക്കണമെന്ന്​ സംഘടനകൾ

മനാമ: പ്രവാസികൾ മരിച്ചാൽ മൃതദേഹം നാട്ടിലെത്തിക്കണമെങ്കിൽ 48 മണിക്കൂർ മുമ്പ്​ രേഖകൾ നാട്ടിലെ വിമാനത്താവളത്തിൽ എത്തിക്കണമെന്ന ഉത്തരവ് അടിയന്തരമായി പിൻവലിക്കണമെന്ന്​ ‘ബഹ്​റൈൻ പ്രതിഭ’ ആവശ്യപ്പെട്ടു. പ്രവാസ ഭൂമിയിൽ മരിക്കുന്നവരുടെ മൃതദേഹങ്ങൾ സാമൂഹിക പ്രവർത്തകരുടെയും മറ്റും കൂട്ടായ ഇടപെടലും സഹായവും വഴി ഉടൻ അയക്കാനുള്ള സാഹചര്യം ഇപ്പോഴുണ്ട്​. ഇതിന്​ തുരങ്കം ​െവക്കുന്ന നീക്കമാണ്​ അധികൃതർ സ്വീകരിക്കുന്നത്​.ഇൗ സമീപനം ഒരിക്കലും അംഗീകരിക്കാൻ കഴിയില്ല. പ്രശ്​നത്തിൽ മുഖ്യമന്ത്രി തന്നെ നേരിട്ട്​ ഇടപെട്ടുവെന്നത്​ ആശാവഹമാണ്​. കേന്ദ്രത്തിലും പ്രശ്​നം അവതരിപ്പിച്ച്​ ഇതുസംബന്ധിച്ച ഉത്തരവ്​ പിൻവലിപ്പിക്കാൻ എം.പിമാർ അടിയന്തര നടപടി സ്വീകരിക്കണമെന്ന്​ ‘പ്രതിഭ’ ​ഭാരവാഹികൾ വാർത്താക്കുറിപ്പിൽ പറഞ്ഞു.

മൃതദേഹം അയക്കുന്ന കാര്യത്തിലുള്ള പുതിയ ഉത്തരവ്​ മനുഷ്യത്വരഹിതമാണെന്ന്   ഐ.​വൈ.സി.സി ആരോപിച്ചു. ബഹ്​റൈനിൽ പ്രവാസികൾ മരിച്ചാൽ രേഖകൾ ശരിയാണെങ്കിൽ അന്ന് തന്നെ മൃതദേഹം നാട്ടിലേക്ക് കൊണ്ട് പോകുവാൻ കഴിയുമായിരുന്നു. എന്നാൽ പുതിയ നിർദേശം വഴി മൃതദേഹം നാട്ടിലെത്തുന്നത്​ വൈകും. എംബാം ചെയ്​ത മൃതദേഹങ്ങൾ 48 മണിക്കൂർ മാത്രമേ സൂക്ഷിക്കാനാകൂഎന്നതാണ്​ വസ്തുത. ഇക്കാര്യം പോലും അധികൃതർ പരിഗണിച്ചിട്ടില്ല എന്നതാണ്​ മനസിലാക്കേണ്ടത്​. 

മരണസർട്ടിഫിക്കറ്റ്, എംബാമിങ്​ സർട്ടിഫിക്കറ്റ്, കോൺസുലേറ്റിൽ മരണം രജിസ്​റ്റർ ചെയ്ത സർട്ടിഫിക്കറ്റ്, പോസ്​റ്റ്​മോർട്ടം റിപ്പോർട്ട് (അറബിയിൽ നിന്ന്​ ഇംഗ്ലീഷിലേക്ക്​ തർജ്ജമ ചെയ്തത് ), റദ്ദ് ചെയ്ത പാസ്പോർട്ട്, ലോക്കൽ പോലിസ് ക്ലിയറൻസ് സർട്ടിഫിക്കറ്റ് എന്നീ രേഖകൾ കാർഗോയിൽ നൽകിയാണ് നടപടി ക്രമങ്ങൾ പൂർത്തീകരിക്കുന്നത്.
പുതിയ നിർദേശം പ്രാബല്യത്തിൽ വരുമ്പോൾ എംബാം ചെയ്ത ശേഷം മൃതദേഹം നേരെ കാർഗോവിഭാഗത്തിൽ എത്തിക്കുന്നതിന്​ മുമ്പ്​  നാട്ടിൽ നിന്ന് ബന്ധപ്പെട്ട വിമാനത്താവളത്തിലെ ഉദ്യോഗസ്ഥ‌രുടെ അനുവാദം വാങ്ങണം. ഇൗ വിഷയത്തിൽ അടിയന്തരമായി ഇടപെടണമെന്നാവശ്യപ്പെട്ട്​ കേരളത്തിൽ നിന്നുള്ള കോൺഗ്രസ്​ എം.പിമാർക്കും മുഖ്യമന്ത്രിക്കും  പ്രതിപക്ഷനേതാവിനും മുൻ മുഖ്യമന്ത്രി ഉമ്മൻ ചാണ്ടിക്കും നിവേദനം സമർപ്പിക്കാൻ ​െഎ.​ൈവ.സി.സി തീരുമാനിച്ചു.

വിദേശത്ത് മരിക്കുന്നവരുടെ മൃതദേഹങ്ങൾ നാട്ടിൽ കൊണ്ടുപോകാനുള്ള പുതിയ നിബന്ധങ്ങൾ പ്രവാസികളോടുള്ള അവഗണനയുടെ തുടർച്ചയാണെന്ന്​ ഇന്ത്യൻ സോഷ്യൽ ഫോറം ആരോപിച്ചു.  ഇതിനെതിരെ പ്രവാസി സമൂഹം ഒറ്റക്കെട്ടായി പ്രതികരിക്കണമെന്ന്  മനാമ സൂഖ് ബ്രാഞ്ച് കമ്മിറ്റി ആവശ്യപ്പെട്ടു. യോഗത്തിൽ മുഹമ്മദ് അലി അധ്യക്ഷത വഹിച്ചു.