കോവിഡ്​ പ്രതിരോധം വിവിധ തലങ്ങളിൽ

മനാമ: കോവിഡിനെ പ്രതിരോധിച്ച്​ രാജ്യത്തെ സ്വദേശികളുടെയും പ്രവാസികളുടെയും ആരോഗ്യവും സുരക്ഷയും ഉറപ്പുവരുത്തുന്നതിന്​ വിവിധ തലങ്ങളിലുള്ള പദ്ധതികളാണ്​ ആവിഷ്​കരിച്ച്​ നടപ്പാക്കുന്നതെന്ന്​ ആരോഗ്യ മന്ത്രാലയത്തിലെ അണ്ടർ സെക്രട്ടറി ഡോ. വലീദ്​ അൽ മാനിഅ്​ വാർത്തസമ്മേളനത്തിൽ പറഞ്ഞു. ആഗോള നിലവാരത്തിലും ലോകാരോഗ്യ സംഘടനയുടെ നിർദേശങ്ങൾക്കനുസരിച്ചുമാണ്​ ഇൗ നടപടികൾ.

കോവിഡ്​ രോഗികളെ ചികിത്സിക്കുന്ന ആരോഗ്യ പ്രവർത്തകരുടെ സുരക്ഷ ഉറപ്പുവരുത്തുന്നതിനാണ്​ കോവിഡ്​ 19 വാക്​സിൻ ഉപയോഗിക്കാൻ അനുമതി നൽകിയത്​. റാപിഡ്​ ആൻറിജൻ പരിശോധന രാജ്യത്ത്​ ആരംഭിച്ചതും രോഗപ്രതിരോധ നടപടികളുടെ ഭാഗമായാണ്​. മൂക്കിൽനിന്നുള്ള സ്രവം എടുത്ത്​ നടത്തുന്ന പരിശോനയിലൂടെ 15 മിനിറ്റിനകം ഫലം അറിയാനാകും. സ്​പെഷലൈസ്​ഡ്​ ലബോറട്ടറി ഇല്ലാതെ തന്നെ ഇൗ പരിശോധന നടത്താൻ കഴിയും. അതേസമയം, പി.സി.ആർ പരിശോധനയാണ്​ ബഹ്​റൈനിൽ അംഗീകാരമുള്ള ഏക പരിശോധന സംവിധാനമെന്നും അദ്ദേഹം കൂട്ടിച്ചേർത്തു.

രാജ്യത്തെ ആരോഗ്യസംബന്ധമായ ഏറ്റവും പുതിയ വിവരങ്ങൾ ലഭ്യമാക്കുന്നതിനാണ്​ ആരോഗ്യ മന്ത്രാലയം പുതിയ വെബ്​സൈറ്റ്​ ആരംഭിച്ചത്​. കോവിഡ്​ പ്രതിരോധത്തിനുള്ള കർമപദ്ധതികൾക്ക്​ പിന്തുണയേകുന്നതാണ്​ ഇൗ വെബ്​സൈറ്റ്​. കോവിഡ്​ ഇല്ലാതായശേഷവും വെബ്​സൈറ്റ്​ തുടരും. പുതിയ ആരോഗ്യ വിവരങ്ങൾക്ക്​ എല്ലാവരും healthalert.gov.bh എന്ന വെബ്​സൈറ്റ്​ സന്ദർശിക്കണമെന്ന്​ അദ്ദേഹം ഒാർമിപ്പിച്ചു. മഹാമാരിയുടെ കാലത്ത്​ യാത്രക്കാരുടെയും ജീവനക്കാരുടെയും ആരോഗ്യം സംരക്ഷിക്കാൻ സ്വീകരിച്ച നടപടികൾക്കുള്ള അംഗീകാരമായി ഇൻറർനാഷനൽ എയർപോർട്​സ്​ കൗൺസിലി​െൻറ ഹെൽത്ത്​ അക്രഡിറ്റേഷൻ സർട്ടിഫിക്കറ്റ്​ നേടിയ ബഹ്​റൈൻ ഇൻറർനാഷനൽ എയർപോർട്ടിനെ അദ്ദേഹം അഭിനന്ദിച്ചു.

സ്​കൂളുകളിൽ ആരോഗ്യസുരക്ഷ നടപടികൾ വിലയിരുത്തുന്നതിന്​ വിദ്യാഭ്യാസ മന്ത്രാലയവുമായി ചേർന്ന്​ നടപടികൾ സ്വീകരിക്കുന്നുണ്ട്​. ചില സ്വകാര്യ സ്​കൂളുകളിൽ വൈറസ്​ ബാധ കണ്ടെത്തിയിട്ടുണ്ട്​. മുൻകരുതലെന്ന നിലയിൽ ഇവിടെ പഠനം 10 ദിവസത്തേക്ക്​ നിർത്തിവെക്കാൻ തീരുമാനിച്ചിട്ടുണ്ട്​. സ്​കൂളുകൾ പൂർണമായും അണുമുക്തമെന്ന്​ ഉറപ്പുവരുത്തിയാകും ക്ലാസുകൾ പുനരാരംഭിക്കുക. കോവിഡ്​ മുക്​തി നേടിയവർ രക്​തദാനത്തിന്​ മുന്നോട്ടുവരണമെന്ന്​ കോവിഡ്​ പ്രതിരോധത്തിനുള്ള നാഷനൽ മെഡിക്കൽ ടീം​ അംഗം ലെഫ്​. കേണൽ മനാഫ്​ അൽ ഖത്താനി ആഹ്വാനം ചെയ്​തു.