ഭീകരാക്രമണ കേസിൽ ആറുപേർക്ക്​ വധശിക്ഷ വിധിച്ചു

മനാമ: ഭീകരാക്രമണങ്ങൾ നടത്തുകയും സൈനിക മേധാവിയെ വധിക്കാൻ പദ്ധതിയിടുകയും ചെയ്​ത സംഭവത്തിൽ ആറുപേർക്ക്​ ഹൈ മിലിട്ടറി കോടതി വധശിക്ഷ വിധിച്ചു. ഇതിൽ ഒരാൾ ബി.ഡി.എഫ്​ ഭടനും മറ്റൊരാൾ ഭീകര പട്ടികയിൽ ഉള്ള ആളുമാണ്​. കേസിൽ 18 പേർക്കെതിരെയാണ്​ വിചാരണ നടന്നത്​. വധശിക്ഷക്ക്​ വിധിച്ചവർക്ക്​ 15 വർഷത്തെ തടവുശിക്ഷയും നൽകാൻ ഉത്തരവായി. ഏഴുപേർക്ക്​ ഏഴുവർഷം വീതം തടവുശിക്ഷ ലഭിക്കും.ഭീകരാക്രമണത്തിന്​ സഹായം നൽകിയതാണ്​ ഇവർക്കെതിരെയുള്ള കുറ്റം. അഞ്ചുപേ​െര കേസിൽ കുറ്റമുക്തരാക്കി. 

വധശിക്ഷക്ക്​ വിധിക്കപ്പെട്ട അൽ സായിദ്​ മുർതാദ അൽ സിന്ധി യു.എസി​​െൻറ ആഗോള ഭീകര പട്ടികയിൽ പെട്ട ആളാണ്​. ഇയാൾക്കെതിരെ ഭീകരതയുമായി ബന്ധമുള്ള നിരവധി കേസുകളുണ്ട്​. മുബാറക്​ ആദിൽ മുബാറക്​ മുഹാന, ഫാദിൽ അസ്സയിദ്​ അബ്ബാസ്​ ഹസൻ റാഥി, അസ്സയിദ്​ അലവി ഹുസൈൻ അലവി, മുഹമ്മദ്​ അബ്​ദുൽ ഹസൻ അഹ്​മദ്​ അൽ മെതഗ്​വി, ഹബീബ്​ അബ്​ദുല്ല ഹസൻ അലി അൽ ജംറി എന്നിവരാണ്​ വധശിക്ഷക്ക്​ വിധിക്കപ്പെട്ട മറ്റ്​ അഞ്ചുപേർ. 
ഇതിൽ സിന്ധി ഇപ്പോൾ ഇറാനിലും അൽ ജംറി ഇറാഖിലും ഒളിവിൽ കഴിയുകയാണ്​. ഇവരാണ്​ ഭീകരസംഘത്തിന്​ രൂപം നൽകുകയും അത്​ നടത്തുകയും ചെയ്​തത്​. ഇവർ ബി.ഡി.എഫ്​ മേധാവിയെ വധിക്കാൻ പദ്ധതിയിടുകയും അതിനായി ആളെ ചുമതലപ്പെടുത്തുകയും ചെയ്​തു. എന്നാൽ, രഹസ്യ വിവരം ലഭിച്ചതിനെ തുടർന്ന്​ അധികൃതർ പദ്ധതി തകർക്കുകയും 10 പേരെ അറസ്​റ്റ്​ ചെയ്യുകയുമായിരുന്നു.    പ്രതികൾക്ക്​ വിധിക്കെതിരെ സുപ്രീം മിലിട്ടറി അപ്പീൽ കോടതിയിലും മിലിട്ടറി കസാഷൻ കോടതിയിലും അപ്പീൽ നൽകാവുന്നതാണ്​.