രാജ്യസഭ സീറ്റ്​ മാണിഗ്രൂപ്പിന്​ നൽകൽ 

മനാമ: കേരളത്തിലെ രാജ്യസഭ സീറ്റ്​ വിഷയത്തിൽ പൊട്ടിത്തെറിച്ച്​ ബഹ്​റൈനിലെ കോൺ അനുകൂല പ്രവാസി സംഘടനയായ ഐ .വൈ.സി.സി ബഹ്‌റൈൻ. കടുത്ത ഭാഷയിലാണ്​ സ്വന്തം പാർട്ടി നേതാക്കളെ ഐ.വൈ.സി.സി  വിമർശിച്ചിരിക്കുന്നത്​. കേരളത്തിലെ കോൺഗ്രസ് പാർട്ടിയെ മാണിയുടെ കാൽചുവട്ടിൽ  കൊണ്ട് വെച്ച  കോൺഗ്രസ്​ നേതൃത്വം  നേതൃത്വം രാജിവെക്കണമെന്നും സംഘടന പുറത്തിറക്കിയ വാർത്താകുറിപ്പിൽ ആവശ്യപ്പെട്ടു. 

ഐക്യ മുന്നണിയിൽ നിന്ന് സ്വയം ഇറങിപ്പോയ കേരളാകോൺഗ്രസ്​  മാണി ഗ്രൂപ്പിന്​  രാജ്യസഭാ സീറ്റ് നൽകുവാനുളള നേതൃത്വത്തി​​​െൻറ തീരുമാനം ലക്ഷക്കണക്കിനു വരുന്ന‌ കോൺഗ്രസ് പ്രവർത്തകരെ അധിക്ഷേപിക്കുന്നതിനു തുല്യമാണ്. അർഹരായ ഒട്ടേറെ നേതാക്കൾ കോൺഗ്രസിലുളളപ്പോൾ ഒരു  പ്രഭാതത്തിൽ സീറ്റ് മാണിക്ക് കൊടുത്തത് കോൺഗ്രസ്​ പ്രവർത്തകരുടെ ആത്മാഭിമാനം പണയം വെക്കുന്നതാണ്. 

വീരേന്ദ്രകുമാറിനു രാജ്യസഭാ സീറ്റ് കൊടുത്തത് കോൺഗ്രസിനു നഷ്​ടമാണ് ഉണ്ടാക്കിയത് . അതിലും വലിയ നഷ്​ടമാകും ഈ തീരുമാനത്തിലൂടെ ഭാവിയിൽ കോൺഗ്രസിന് ഉണ്ടാവുക.ഈ തീരുമാനം പുനഃപരിശോധിച്ചില്ലെങ്കിൽ വരുന്ന തെരഞ്ഞെടുപ്പുകളിൽ വലിയ പ്രത്യാഖ്യാതം നേരിടേണ്ടി വരും സംശയമില്ലെന്നും പ്രസ്​താവനയിൽ മുന്നറിയിപ്പ്​ നൽകുന്നു.  മുന്നണി മര്യാദയുടെ പേരിൽ വിട്ട് വീഴ്​ചകൾ ചെയ്യേണ്ടത് കോൺഗ്രസ് മാത്രമല്ല എന്ന് ആർജ്ജവത്തോടെ ഘടകകക്ഷി നേതാക്കളുടേ മുഖത്ത് നോക്കി പറയാൻ കഴിയാത്തത് നട്ടെല്ലില്ലായ്​മയാണെന്നും ഐ.വൈ.സി.സി പ്രസിഡൻറ്​ ബേസിൽ നെല്ലിമറ്റം പറഞ്ഞു.