ബസ് സർവീസ്​ വിവരങ്ങളറിയാൻ ആപ്​ നിലവിൽ വന്നു

മനാമ: ബഹ്​റൈനിലെ ബസ്​ സർവീസ്​ ഉപയോഗിക്കുന്നവർക്കായി പുതിയ ആപ്​ നിലവിൽ വന്നു. കഴിഞ്ഞ ദിവസം ഇൗസ ടൗണിലെ ബസ്​ ഡിപ്പോയിൽ നടന്ന ചടങ്ങിൽ ഗതാഗത^ടെലികമ്മ്യൂണിക്കേഷൻ മന്ത്രാലയമാണ്​ ആപ്​ പുറത്തിറക്കിയത്​. ഇത്​ ആൻഡ്രോയിഡ്​ ഫോണുകളിൽ ഡൗൺലോഡ്​ ചെയ്യാം. ഇംഗ്ലീഷ്​, അറബിക്​ ഭാഷകളിലുള്ള ഒാപറേഷൻ സാധ്യമാണ്​. 
വിവിധ റൂട്ടുകളെയും സ്​റ്റോപ്പുകളെയും സംബന്ധിച്ച സമഗ്ര വിവരം ആപ്​ വഴി ലഭിക്കും. യാത്രക്കാരന്​ നിശ്​ചിത സ്​ഥലത്ത്​ എത്തിച്ചേരാനായി ആപ്പിലെ ‘പ്ലാൻ യുവർ ജേണി’ എന്ന ഫീച്ചർ ഉപയോഗിക്കാം. ലൈവ്​ സ്​ട്രീമിങ്​ ഉള്ളതിനാൽ ബസ്​ സ്​റ്റോപ്പിൽ വരുന്ന സമയം അറിയാനാകും. അതുവഴി യാത്ര കൃത്യമായി ആസൂത്രണം ചെയ്യാം. മന്ത്രാലയത്തി​​െൻറ ലാൻറ്​ ട്രാൻസ്​പോർട്​സ്​, പോസ്​റ്റൽ കാര്യ അണ്ടർ സെക്രട്ടറി മറിയം അഹ്​മദ്​ ജുമാൻ, ബഹ്​റൈൻ പബ്ലിക്​ ട്രാൻസ്​പോർട്​ കമ്പനി (ബി.പി.ടി.സി) ജന.മ​ാനേജർ ബോർജ ബെർമുഡെസ്​ തുടങ്ങിയവർ ഉദ്​ഘാടന വേളയിൽ സംബന്ധിച്ചു. പൊതുഗതാഗത രംഗത്ത്​ ലഭ്യമായ ഏറ്റവും മികച്ച സൗകര്യങ്ങൾ യാത്രക്കാർക്ക്​ ലഭ്യമാക്കാനാണ്​ മന്ത്രാലയം ലക്ഷ്യമിടുന്നതെന്ന്​ മറിയം അഹ്​മദ്​ ജുമാൻ പറഞ്ഞു. പുതിയ ആപ്​ അന്താരാഷ്​ട്ര നിലവാരം പുലർത്തുന്നതാണ്​. രാജ്യത്ത്​ നടപ്പാക്കി വരുന്ന ‘ഇക്കണോമിക്​ വിഷൻ^2030’ പദ്ധതിയുടെ ലക്ഷ്യങ്ങൾ പൂർത്തീകരിക്കാനുള്ള നീക്കങ്ങളാണ്​ വിവിധ മേഖലകളിൽ നടക്കുന്നത്​. 
ജനങ്ങൾക്ക്​ സുരക്ഷയും ഉന്നത നിലവാരവുമുള്ള പൊതുഗതാഗതം ഉറപ്പാക്കുമെന്നും അവർ കൂട്ടിച്ചേർത്തു.
ആപ് ഉപയോഗിച്ച ശേഷം ജനങ്ങളുടെ അഭിപ്രായങ്ങളും മറ്റും വിലയിരുത്തി കൂടുതൽ സൗകര്യങ്ങളോടുകൂടി ഇത്​ വിപുലീകരിക്കാനും അധികൃതർക്ക്​ ആലോചനയുണ്ട്​.