തകർന്ന ​കെട്ടിടത്തിനടിയിൽ നിന്ന്​ മൂന്ന്​ മൃതദേഹങ്ങൾ കണ്ടെടുത്തു, മരണസംഖ്യ നാലായി

മനാമ: മനാമയിൽ നെസ്​റ്റോ സൂപ്പർ മാർക്കറ്റിന്​ പിറകിൽ ശൈഖ്​ ഹമദ്​ റോഡിനടുത്തായുളള ഗല്ലിയിലെ പഴയ മൂന്നുനില കെട്ടിടം തകർന്നുവീണ സംഭവത്തിൽ ​ ആകെ നാലുപേർ മരിച്ചു. ഇതിൽ ഒരാൾ ചൊവ്വാഴ്​ച രാത്രിയാണ്​​ മരിച്ചത്​. മറ്റുള്ളവരുടെ മൃതദേഹം ഇന്നലെ കെട്ടിടത്തി​​​െൻറ അവശിഷ്​ടങ്ങൾക്കിടയിൽ നിന്നും കണ്ടെടുക്കുകയുമായിരുന്നു. പരിക്കേറ്റവരിൽ കൂടുതലും ബംഗ്ലാദേശികളാണ്​. ഒരു ഇന്ത്യക്കാരനും പരിക്കേറ്റിട്ടുണ്ട്​. രണ്ടുപേരെ സൽമാനിയ ആശുപത്രിയിൽ ശസ്​ത്രക്രിയക്ക്​ വിധേയമാക്കി. രണ്ടുപേരെ ബി.ഡി.എഫ്​ ആശുപത്രിയിലേക്ക്​ കഴിഞ്ഞ ദിവസം മാറ്റിയിരുന്നു. പഴയ കെട്ടിടത്തി​​​െൻറ താഴത്തെ നിലയിലുള്ള റസ്​റ്റോറൻറി​ൽ പാചക വാതക സിലിണ്ടർ പൊട്ടിത്തെറിച്ചതാണ്​ അപകട കാരണമെന്ന്​ പരിക്കേറ്റവർ മൊഴി നൽകിയിട്ടുണ്ട്​. ചൊവ്വാഴ്​ച രാത്രി ഏഴുമണിയോടെയായിരുന്നു അപകടം ഉണ്ടായത്​. വലിയ ശബ്​ദത്തിൽ പൊട്ടിത്തെറിയോടെയായിരുന്നു കെട്ടിടം നിലംപതിച്ചത്​. സമീപത്തെ കെട്ടിടങ്ങൾക്കും ഇൗ സമയത്ത്​ കുലുക്കം ഉണ്ടായി. തുടർന്ന്​ വിവരം അറിഞ്ഞെത്തിയ സിവിൽ ഡിഫൻസ്​ ഫോഴ്​സ്​ രക്ഷാപ്രവർത്തനം നടത്തുകയും പരിക്കേറ്റവരെ ആശുപത്രിയിൽ എത്തിക്കുകയുമായിരുന്നു. രാത്രി വൈകിയും തെരച്ചിൽ നടത്തിയിരുന്നു.