വായനയുടെ ഉത്​സവാഘോഷം നാളെ മുതൽ കേരളീയ സമാജത്തിൽ

മനാമ: വായനയുടെ ഉത്​സവപ്പറമ്പ്​ ഒരുക്കിക്കൊണ്ട്​ ദശദിന പുസ്​തകോത്​സവത്തിന്​ നാളെ ബഹ്​റൈൻ കേരളീയ സമാജത്തി ൽ തുടക്കമാകും. മേളയുടെ ഒൗപചാരിക ഉദ്​ഘാടനം വ്യാഴാഴ്​ച നടൻ പ്രകാശ്​രാജ്​ നിർവ്വഹിക്കും. എൻ.എസ്. മാധവൻ, കെ.ജി. ശങ്ക രപിള്ള , കെ.വി. മോഹൻ കുമാർ , ദേശീയ രാഷ്ട്രീയത്തിൽ ശ്രദ്ധേയയായ മീനാക്ഷി ലേഖി, ഡോ ബാല ശങ്കർ, നമ്പി നാരായണൻ തുടങ്ങിയവർ സാഹിത്യോത്സവത്തിൽ വിവിധ ദിവസങ്ങളിലായി പങ്കെടുക്കും.

ഇത്തവണത്തെ പ​ുസ്​തകോത്​സവത്തിൽ കൊച്ചിൻ ബിനാലെയുടെ ഒരു മിനിപ്പതിപ്പ്​ സംഘടിപ്പിച്ചിട്ടുണ്ട്​. അതിനായുള്ള ഒരുക്കങ്ങൾ തകൃതിയായി നടക്കുകയാണന്ന്​ സമാജം എൻറർടെയിൻമ​​െൻറ്​ സെക്രട്ടറി ഹരീഷ്​ മേനോൻ ‘ഗൾഫ്​ മാധ്യമ’ത്തോട്​ പറഞ്ഞു. കുട്ടികൾക്ക് പ്രത്യേക പ്ലേ കോർണറും ഒരുക്കിയിട്ടുണ്ട്. മീനാക്ഷി ലേഖി, ഡോ ബാല ശങ്കർ, നമ്പി നാരായണൻ തുടങ്ങിയവർ സാഹിത്യോത്സവത്തിൽ വിവിധ ദിവസങ്ങളിലായി പങ്കെടുക്കും.
ഇംഗ്ലീഷ്, മലയാളം ഭാഷകളിൽ പ്രസിദ്ധീകരിക്കപ്പെട്ട പുസ്​തക പ്രദർശനത്തിനു പുറമേ കുട്ടികളുടെ വിനോദത്തിനും വിജ്ഞാനത്തിനും വകനൽക്കുന്ന കാർണിവെൽ, ചിത്ര പ്രദർശനങ്ങൾ, ആർട്ട് ഇൻസ്റ്റലേഷൻസ്, ഫോട്ടോ പ്രദർശനങ്ങൾ, നാടൻ കലകൾ, കാവ്യസന്ധ്യകൾ, സംഗീത സദസ്​, സാഹിത്യ ക്യാമ്പ് എന്നിങ്ങനെ വർണ്ണാഭമായ കലാസാംസ്​കാരിക പരിപാടികളോടെയാണ് പുസ്തകോത്സവം സംഘടിപ്പിച്ചിട്ടുള്ളത്. പുസ്തക ഉത്സവത്തോടനുബന്ധിച്ച് സമാജം വനിതാവേദി അംഗങ്ങളുടെ നേതൃത്വത്തിൽ ജി.സി.സി തലത്തിൽ ആദ്യമായി അവതരിപ്പിക്കപ്പെട്ട എഴുപതിൽപരം വനിതകൾ പങ്കെടുക്കുന്ന മെഗാ ചരടുപിന്നിക്കളിയുടെ അവതരണം ഡിസംബർ 14 ന്​ സമാജം അങ്കണത്തിൽ അരങ്ങേറും.