വേനലിലെ പുറംജോലി നിരോധനം: തൊഴിൽ മന്ത്രി ​േജാലി സ്​ഥലങ്ങളിൽ  പരി​േശാധന നടത്തി 

മനാമ: വേനലിലെ പുറംജോലി നിരോധനം എങ്ങനെ പാലിക്കപ്പെടുന്നുവെന്ന കാര്യം നേരിട്ട്​ മനസിലാക്കാനായി തൊഴിൽ, സാമൂഹിക വികസന മന്ത്രി ജമീൽ ബിൻ മുഹമ്മദലി ഹുമൈദാൻ വിവിധ വർക്​സൈറ്റുകളിൽ പരിശോധന നടത്തി. ഇൗ മാസം ഒന്ന്​ മുതൽ നടപ്പാക്കിയ ഉച്ചസമയത്തെ പുറം ജോലി നിരോധനം ആഗസ്​റ്റ്​ 31വരെ നീളും. 
തൊഴിൽ മന്ത്രാലയത്തിലെ ഉദ്യോഗസ്​ഥരും മന്ത്രിയോടൊപ്പമുണ്ടായിരുന്നു. തൊഴിൽ സ്​ഥലത്തെ സുരക്ഷ ഉറപ്പാക്കാനായി സ്വീകരിച്ച നടപടികൾ വിവിധ സൈറ്റുകളിലെ സൂപ്പർവൈസർമാർ മന്ത്ര​ിയോട്​ വിശദീകരിച്ചു.     ഉച്ചസമയത്തെ തൊഴിൽ നിരോധനം നടപ്പാക്കുന്നതിൽ കമ്പനികൾ കാണിക്കുന്നശുഷ്​കാന്തി പ്രശംസനീയമാണെന്ന്​ മന്ത്രി പറഞ്ഞു. ഇതൊരു മാനുഷിക പരിഗണന ലഭിക്കേണ്ട വിഷയമാണ്​. തൊഴിലാളികളുടെ സുരക്ഷയും ക്ഷേമവും ഉറപ്പാക്കേണ്ടതുണ്ട്​. ഇതിന്​ എല്ലാവരും താൽപര്യമെടുക്കണം. ഇത്തരം പരിശോധനകൾ മന്ത്രാലയം കർശനമാക്കും. നിയമലംഘകർക്കെതിരെ നടപടി സ്വീകരിക്കും. 
തൊഴിലാളികളുടെ സുരക്ഷയും അവകാശങ്ങളും ഉറപ്പാക്കുന്ന സമീപനമാണ്​ ബഹ്​റൈൻ സ്വീകരിച്ചുവരുന്നത്​. മേഖലയിലെ രാജ്യങ്ങളിൽ ഇൗ നടപടിയിൽ ബഹ്​റൈൻ മുന്നിലാണെന്നും അദ്ദേഹം കൂട്ടിച്ചേർത്തു.