ബഹ്റൈന്‍ സൈക്ളിങ് ടീം രൂപവത്കരിച്ചു 

മനാമ: ബഹ്റൈന്‍ മെരിഡ സൈക്ളിങ് ടീം രൂപവത്കരിച്ചു. മേഖലയില്‍ തന്നെ ആദ്യമായാണ് ഈ ടീം രൂപവത്കരിക്കുന്നത്്. 
യുവജന, സ്പോര്‍ട്സ് കാര്യങ്ങള്‍ക്കായുള്ള ഹമദ് രാജാവിന്‍െറ പ്രത്യേക പ്രതിനിധി ശൈഖ് നാസിര്‍ ബിന്‍ ഹമദ് ആല്‍ഖലീഫയാണ് ഇതിന് നേതൃത്വം നല്‍കിയത്. അദ്ദേഹത്തെയും ടീമിനെയും കഴിഞ്ഞ ദിവസം ഹമദ് രാജാവ് സ്വീകരിക്കുകയും അഭിനന്ദനം അറിയിക്കുകയും ചെയ്തു. 
ടീം രൂപവത്കരണത്തെക്കുറിച്ചും ലക്ഷ്യത്തെക്കുറിച്ചും ശൈഖ് നാസിര്‍ ഹമദ് രാജാവിനോട് വിശദീകരിച്ചു. ഈ രംഗത്തെ വിവിധ മത്സരങ്ങളില്‍ ബഹ്റൈനില്‍ നിന്നുള്ള ടീമും ഇനി മാറ്റുരക്കും. 
യുവാക്കളുടെ കര്‍മശേഷിയെയും കായിക രംഗത്തോടുള്ള അവരുടെ താല്‍പര്യത്തെയും ശരിയായി ഉപയോഗപ്പെടുത്താനുള്ള നീക്കങ്ങളില്‍ ഹമദ് രാജാവ് സംതൃപ്തി രേഖപ്പെടുത്തി. സ്പോര്‍ട്സ് രംഗത്തെ മുന്നേറ്റത്തിന് രാജാവ് നല്‍കുന്ന പ്രചോദനം ഏറെ സഹായകരമാണെന്നും ഇതിന് പ്രത്യേകം നന്ദി രേഖപ്പെടുത്തുന്നതായും ശൈഖ് നാസിര്‍ ബിന്‍ ഹമദ് ആല്‍ഖലീഫ പറഞ്ഞു.