ഫലസ്തീനൊപ്പമെന്ന്​ ഉൗന്നിപ്പറഞ്ഞ്​ ബഹ്​റൈൻ

മനാമ: ഫലസ്തീനെതിരെ ഇസ്രായേൽ തുടരുന്ന കിരാതമായ ആക്രമണങ്ങളും അധിനിവേശവും അവസാനിപ്പിക്കണമെന്ന് വിദേശകാര്യ മന്ത്രാലയത്തിലെ ജി. സി.സി കാര്യ അണ്ടര്‍ സെക്രട്ടറി വഹീദ് മുബാറക് സയ്യാര്‍ പറഞ്ഞു.
 അന്താരാഷ്​ട്ര ഫലസ്തീന്‍ ഐക്യദാര്‍ഢ്യ ദിനത്തോടനുബന്ധിച്ച് മനാമയിലെ യു.എന്‍ ആസ്ഥാനത്ത് സംഘടിപ്പിച്ച പരിപാടിയില്‍ സംസാരിക്കുകയായിരുന്നു അദ്ദേഹം. 
ഫലസ്തീന് പിന്തുണ നല്‍കാൻ എന്നും ബഹ്​റൈൻ ശ്രമിച്ചിട്ടുണ്ട്​. യു.എന്‍ സംവിധാനങ്ങളിലൂടെ അവർക്ക്​ സഹായം നൽകുന്നുമുണ്ട്. ഖുദുസ് കേന്ദ്രമാക്കി സ്വതന്ത്ര ഫലസ്തീന്‍ രാഷ്​ട്രം രൂപവത്കരിക്കണമെന്നാണ് ഇക്കാര്യത്തില്‍ ബഹ്‌റൈ​​െൻറ എന്നത്തെയും അഭിപ്രായം. 
നിലവില്‍ ഇസ്രായേല്‍ തുടരുന്ന അധിനിവേശവും ഉപരോധവും അവസാനിപ്പിക്കുന്നതിന്​ അന്താരാഷ്​ട്ര തലത്തില്‍ ശ്രമം ശക്തിപ്പെടുത്തേണ്ടതുണ്ട്​. 
മേഖലയുടെ സമാധാനത്തിന്​ ഫലസ്തീന്‍ പ്രശ്‌നത്തിന് ശാശ്വത പരിഹാരം അനിവാര്യമാണ്. സാധ്യമായ എല്ലാ രീതികളും ഇതിന് ശ്രമിക്കണം. ഫലസ്തീന്‍ പ്രശ്‌നത്തിൽ യു.എന്‍ നല്‍കുന്ന പ്രാധാന്യം  ശ്രദ്ധേയമാണ്. 
ഫലസ്തീനില്‍ ശാശ്വതമായ സമാധാനം സ്ഥാപിക്കാന്‍ എല്ലാ മേഖലകളില്‍ നിന്നുമുള്ള സമ്മര്‍ദവും പ്രവര്‍ത്തനവും അനിവാര്യമാണെന്നും അദ്ദേഹം കൂട്ടിച്ചേര്‍ത്തു.