ബഹ്​റൈൻ -കോഴി​ക്കോട്​ വിമാനം പുറപ്പെടാൻ വൈകും; വിമാനം പുറപ്പെടുക വൈകിട്ട്​ 5.35ന്​

മനാമ: പ്രവാസികളെ നാട്ടിലെത്തിക്കുന്ന വന്ദേ ഭാരത്​ ദൗത്യത്തിൽ ബഹ്​റൈനിൽനിന്ന്​ കോഴിക്കോ​േട്ടക്കുള്ള എയർ ഇന്ത്യ എക്​സ്​പ്രസ്​ വിമാനം പുറപ്പെടാൻ വൈകും. ബഹ്​റൈൻ സമയം വൈകിട്ട്​ 4.30നാണ്​ വിമാനം പുറപ്പെടാൻ നിശ്​ചയിച്ചിരുന്നത്​. എന്നാൽ, തിരുവനന്തപുരത്തുനിന്നുള്ള വിമാനം വൈകിയതിനാൽ ഇവിടെനിന്ന്​ പുറപ്പെടേണ്ട സമയം സമയം 5.35ലേക്ക്​ മാറ്റി നിശ്​ചയിക്കുകയായിരുന്നു. 180 യാത്രക്കാരാണ്​ വിമാനത്തിൽ യാത്ര ചെയ്യുന്നത്​. നാല്​ കൈക്കുഞ്ഞുങ്ങളുമുണ്ട്​. 

അപ്രതീക്ഷിതമായുണ്ടായ സഹാചര്യങ്ങളാണ്​ തിരുവനന്തപുരത്തുനിന്ന്​ ബഹ്​റൈനിലേക്കുള്ള വിമാനം വൈകാനിടയാക്കിയത്​. ബഹ്​റൈനിലേക്കുള്ള വിമാനത്തിൽ ബഹ്​റൈൻ പൗരൻമാരെയും സാധുവായ റസിഡൻറ്​ പെർമിറ്റ്​ ഉള്ളവരെയും യാത്ര ചെയ്യാൻ അനുവദിച്ചിരുന്നു. ഇതനുസരിച്ച്​ 90ഒാളം പേർ ടിക്കറ്റ്​ എടുക്കുകയും ചെയ്​തു.

എന്നാൽ, ​ഞായറാഴ്​ച രാത്രി ബഹ്​റൈൻ വിദേശകാര്യ മന്ത്രാലയം അധികൃതർ ബഹ്​റൈൻ വിമാനത്താവള അധികൃതർ മുഖേന എയർ ഇന്ത്യ എക്​സ്​പ്രസ്​ അധികൃതരെ ബന്ധപ്പെട്ട്​ എല്ലാ യാത്രക്കാരുടെയും പാസ്​പോർട്ട്​ വിശദാംശങ്ങൾ ആവശ്യപ്പെട്ടു. എല്ലാവരുടെയും വിസ സാധുത പരിശോധിക്കുന്നതിനായിരുന്നു ഇത്​.

എന്നാൽ, ടിക്കറ്റ്​ എടുത്തവരിൽനിന്ന്​ പാസ്​പോർട്ട്​ വിവരങ്ങൾ എയർ ഇന്ത്യ എക്​സ്​പ്രസ്​ ശേഖരിച്ചിരുന്നില്ല. തുടർന്ന്​, തിങ്കളാഴ്​ച രാവിലെ തിരുവനന്തപുരം എയർ ഇന്ത്യ എക്​സ്​പ്രസ്​ അധികൃതർ ഒാരോ യാഭ്രതക്കാരനെയും ബന്ധപ്പെട്ട്​ പാസ്​പോർട്ട്​ വിവരങ്ങൾ ശേഖരിച്ചു. ഇൗ വിവരങ്ങൾ​ ബഹ്​റൈൻ വിദേശകാര്യ മന്ത്രാലയം അധികൃതർക്ക്​ കൈമാറി. അവർ നടത്തിയ പരിശോധനയിൽ ആറോളം പേർക്ക്​ യാത്രാ അനുമതി ലഭിച്ചില്ല. തുടർന്ന്​, ഇവരെ ഒഴിവാക്കിയാണ്​ വിമാനം ബഹ്​റൈനിലേക്ക്​ പുറപ്പെട്ടത്​.

തിരുവനന്തപുരത്തുനിന്ന്​ ഒരു മണിക്ക്​ പുറപ്പെടേണ്ട വിമാനത്തിന്​ 2.30ഒാടെയാണ്​ യാത്ര തിരിക്കാനായത്​. ബഹ്​റൈൻ സമയം വൈകിട്ട്​ 4.35ന്​ ഇൗ വിമാനം ഇവിടെ എത്തും.