ബഹ്​റൈനിൽ നിറപ്പകിട്ടാർന്ന ഖര്‍ഖാഊന്‍ ആഘോഷം തുടങ്ങി

മനാമ: ബഹ്റൈന്‍ പാരമ്പര്യ-സാംസ്കാരിക അതോറിറ്റിയുടെ നേതൃത്വത്തില്‍ മൂന്ന് ദിവസം നീണ്ടു നില്‍ക്കുന്ന ഖര്‍ഖാഊ ന്‍ ആഘോഷം ആരംഭിച്ചു. റമദാൻ 15 നെ വരവേൽക്കുന്നതി​​െൻറ മുന്നോടിയായി മൂന്ന്​ ദിവസങ്ങളിലായാണ്​ ഇൗ പരമ്പരാഗത ആഘോ ഷം നടക്കുന്നത്​. പാരമ്പര്യത്തെ മറക്കരുത്​ എന്നുള്ള അർഥത്തിൽ നൻമകളെ വാഴ്​ത്തിപ്പാടി കുട്ടികളുടെ സംഘങ്ങൾ വാദ് യങ്ങളുമായി വീടുകൾ കയറിയിറങ്ങുകയും വീട്ടുകാർ കുട്ടികൾക്ക്​ മധുരം നൽകുകയും ചെയ്യും.

ഇന്നലെ ബഹ്റൈന്‍ ഫോര്‍ട്ട് മ്യൂസിയത്തില്‍ രാത്രി ഒമ്പതിന് ഖര്‍ഖാഊന്‍ ആഘോഷം നടന്നു. ഇന്ന്​ രാത്രി ഒമ്പതിന് ബാബുല്‍ ബഹ്റൈനിലായിരിക്കും ആഘോഷങ്ങള്‍. ഞായറാഴ്​ച ദോഹത് അറാദ് പാര്‍ക്കിന് സമീപമുള്ള സ്​റ്റുഡിയോ 244 ല്‍ വിവിധ പരിപാടികളോടെ ഖര്‍ഖാഊന്‍ ആഘോഷങ്ങള്‍ നടക്കും. ഖര്‍ഖാഊന്‍ ആഘോഷവുമായി എത്തിച്ചേരുന്ന കുട്ടികളെ ഒാരോ വീടുകളിലും മധുരവും വസ്​ത്രവും കളിപ്പാട്ടവും നൽകിയാണ്​ വീട്ടുകാർ വരവേൽക്കുന്നത്​. അതിനാൽ കഴിഞ്ഞ ദിവസങ്ങളിൽ സൂഖുകളിലും കടകളിലും ഇതിനായുള്ള സാധനങ്ങളുടെ വിൽപ്പന തകൃതിയായിരുന്നു. കുട്ടികളും കുടുംബാംഗങ്ങളും സാധനങ്ങൾ വാങ്ങാൻ പാതിരാത്രിവരെ എത്തുന്നുണ്ടായിരുന്നു.
അത്തിപ്പഴവും പിസ്​തയും ഇൗന്തപ്പഴവും മിഠായികളും എല്ലാമടങ്ങിയ നിറപ്പകിട്ടാർന്ന സമ്മാനങ്ങൾ ഖര്‍ഖാഊന്‍ ആഘോഷിക്കുന്ന കുട്ടികളുടെ ഉത്​സാഹവും വർധിപ്പിക്കും. ഒപ്പം ആ ഖര്‍ഖാഊന്‍ രാത്രികളുടെ മനോഹാരിതയും.