ഒഴുക്കിൽ പെട്ടത്​ ഏഴ്​ മാസം പ്രായമുള്ള കുഞ്ഞ്​; നാല്​ ദിവസമായിട്ടും കണ്ടെത്താനായില്ല

യാമ്പു: വെള്ളിയാഴ്​ചയുണ്ടായ പ്രളയത്തിൽ വാദിസമായിൽ ഒഴുക്കിൽ പെട്ട്​ കാണാതായത്​ ഏഴ്​ മാസം പ്രായമുള്ള പെൺകുഞ്ഞ്​. സിവിൽ ഡിഫൻസ്​ സർവസന്നാഹങ്ങളുമായി നാലാം ദിവസവും തെരച്ചിൽ നടത്തി. മർകസ്​ തൽഅത്​ നസായിലെ വാദി സമാഇലാണ്​ കുഞ്ഞിനെ കാണാതായത്​. താഴ്​വരയുടെ വിവിധ ഭാഗങ്ങളിൽ തിങ്കളാഴ്​ചയും തെരച്ചിൽ നടന്നു. സിവിൽ ഡിഫൻസ്​, നാഷനൽ ഗാർഡ്​, സന്നദ്ധ സേവന പ്രവർത്തകർ എന്നിവരുൾപ്പെട്ട സംഘവും ഹെലികോപ്​ടറും തെരച്ചിലിനായി രംഗത്തുണ്ട്​.

കാണാതായ കുട്ടിക്ക്​ വേണ്ടി വ്യാപക തെരച്ചിൽ മുഴുസമയം തുടരുകയാണെന്ന്​ മദീന സിവിൽ ഡിഫൻസ്​ വക്​താവ്​ കേണൽ ഖാലിദ്​ മുബാറക്​​ ജുഹ്​നി പറഞ്ഞു. ഇതിനായി പലയിടങ്ങളിൽ ആളുകളെ നിയോഗിച്ചിട്ടുണ്ട്​. യാംബുവിന്​ കിഴക്ക്​​ മലകൾക്ക്​ താഴെ സ്​ഥിതി ചെയ്യുന്ന പ്ര​​ദേശമാണ്​​ വാദി സമാഅ്​. താഴ്​വരകളോട്​ കൂടിയ സ്​ഥലമാണ്​. കഴിഞ്ഞ വെള്ളിയാഴ്​ചയാണ്​ ​പ്രദേശത്ത്​ കനത്ത മഴയും ഒഴുക്കുമുണ്ടായത്​. വെള്ളത്തിൽ കുടുങ്ങിയ 40 ഒാളം ആളുകളെ സിവിൽ ഡിഫൻസ്​ രക്ഷപ്പെടുത്തിയിരുന്നു. ഒഴുക്കിൽപ്പെട്ട്​ സ്​ത്രീയടക്കം നാല്​ പേർ മരിച്ചിരുന്നു.