നിയമം ലംഘിച്ച്​ പിടികൂടിയ 2000 കിലോ ചെറിയ മീനുകള്‍ പിടിച്ചെടുത്തു

മനാമ: മല്‍സ്യ സമ്പത്ത് സംരക്ഷിക്കുന്നതി​ന്​ നടപ്പാക്കുന്ന നടപടിക്രമത്തി​​​െൻറ ഭാഗമായി 2000 കിലോ ചെറു മീനുകള്‍ പിടികൂടിയതായി സമുദ്ര സമ്പദ് വിഭാഗം അറിയിച്ചു. നവംബര്‍ നാല് മുതല്‍ 16 വരെയുള്ള ദിവസങ്ങളില്‍ നടത്തിയ പരിശോധനയിലാണ് 2000 കിലോ ചെറുമല്‍സ്യങ്ങള്‍ കണ്ടെത്തിയത്. മല്‍സ്യ സമ്പത്ത് സംരക്ഷിക്കുന്നതി​​​െൻറ ഭാഗമായി ചെറിയ മല്‍സ്യങ്ങളെ പിടിക്കുന്നതിന് വിലക്കുണ്ട്. വിലക്ക്​ ലംഘിച്ച്​ പിടികൂടിയ മല്‍സ്യങ്ങള്‍ വില്‍പന നടത്തുന്നയിടങ്ങളില്‍ നിന്നാണ് പിടികൂടിയത്.

95 നിയമ ലംഘനങ്ങളാണ് ഇതുമായി ബന്ധപ്പെട്ട് കണ്ടെത്തിയിട്ടുള്ളത്. പരിശോധകരെ കണ്ട ചില അനധികൃത വ്യാപാരികള്‍ മല്‍സ്യമുപേക്ഷിച്ച് രക്ഷപ്പെടുകയും ചെയ്തു. നിയമം ലംഘിച്ചതി​​​െൻറ പേരില്‍ ഇതേവരേയായി 11 മല്‍സ്യബന്ധന ലൈസന്‍സുകള്‍ മരവിപ്പിച്ചിട്ടുണ്ട്. നിയമം കര്‍ശനമായി പാലിക്കുമെന്ന് വാഗ്ദാനം ചെയ്ത ചിലര്‍ക്ക് രണ്ടാമതും മല്‍സ്യബന്ധനത്തിന് അനുമതി നല്‍കിയതായി അധികൃതർ വ്യക്​തമാക്കി. രണ്ടാമതും നിയമം ലംഘിക്കുന്നവരെ പബ്ലിക്​ പ്രൊസിക്യൂഷന് മുന്നില്‍ ഹാജരാക്കുമെന്നും മുന്നറിയിപ്പുണ്ട്​. ഒരു മാസത്തില്‍ കുറയാത്ത തടവും 300 മുതല്‍ 1000 ദിനാര്‍ വരെ പിഴയുമാണ് ഇതിന്​ ശിക്ഷ ലഭിക്കുക.