സാംസ്​കാരിക മന്ത്രിമാരുടെ ഇസ്​ലാമിക സമ്മേളനത്തിന് ബഹ്റൈന്‍ ആതിഥ്യമരുളും

മനാമ: സാംസ്​കാരിക മന്ത്രിമാരുടെ ഇസ്​ലാമിക സമ്മേളനത്തിന് ബഹ്റൈന്‍ ആതിഥ്യമരുളുമെന്ന് ഇസ്​ലാമിക് എഡ്യൂക്കേഷനല്‍, സയൻറിഫിക് ആന്‍റ് കള്‍ച്ചറല്‍ ഓര്‍ഗനൈസേഷന്‍ ഡയറക്​ടര്‍ ഡോ. അബ്​ദുല്‍ അസീസ് അത്തുവൈജിരി അറിയിച്ചു. അറബ്-ഇസ്​ലാമിക രാജ്യങ്ങളിലെ സാംസ്​കാരിക മന്ത്രിമാരെ പങ്കെടുപ്പിച്ചുള്ളതാണ് സമ്മേളനം. നവംബറില്‍ നടക്കുന്ന സമ്മേളനത്തില്‍ തീവ്രവാദത്തിനെതിരെയുളള പ്രവര്‍ത്തനങ്ങളും അതി​​​െൻറ ഉറവിടം മരവിപ്പിക്കുന്നതുമായി ബന്ധപ്പെട്ട കാര്യങ്ങളുമാണ് പ്രത്യേകമായി ചര്‍ച്ച ചെയ്യുന്നത്. ഇസ്​ലാമിക, ക്രൈസ്തവ വിശുദ്ധ സ്ഥലങ്ങളിലെ ഇസ്രായേല്‍ കടന്നുകയറ്റവും ഖുദ്​സിലെ ചരിത്ര അടയാളങ്ങള്‍ തേച്ചുമായ്ച്ചു കളയാനുള്ള ശ്രമങ്ങളും ചര്‍ച്ച ചെയ്യും. അടുത്ത വര്‍ഷം ടുനീഷ്യയില്‍ നടക്കുന്ന സമ്മേളനത്തില്‍ ഇതുമായി ബന്ധപ്പെട്ട വിശദമായ ചര്‍ച്ചകളും നടക്കും.

നിലവില്‍ ലോകത്ത് അസ്ഥിരതയും അശാന്തിയുമാണ് നിലനില്‍ക്കുന്നത്. ധാരാളം സംഘര്‍ഷങ്ങളും തര്‍ക്കങ്ങളും കൊണ്ട് മുഖരിതാണ് ലോക രാഷ്​ട്രങ്ങള്‍. തെറ്റിദ്ധാരണ പരത്തുകയും അതി​​​െൻറ ചുവടുപിടിച്ച് തെറ്റായ പ്രചാരണങ്ങളും ധാരാളമായി നടന്നു കൊണ്ടിരിക്കുന്നു. ഇസ്​ലാമിക സംസ്കാരത്തെ മോശമായി ചിത്രീകരിക്കാനും ഖുര്‍ആനെയും പ്രവാചകനെയും ഇസ്​ലാമിക ചരിത്രത്തെയും അവഹേളിക്കാനുള്ള ശ്രമങ്ങളും ഒരു ഭാഗത്ത് ശക്തമായിക്കൊണ്ടിരിക്കുന്നുവെന്നും അദ്ദേഹം പറഞ്ഞു. ഇസ്​ലാമിക ലോകം നേരിടുന്ന ഇത്തരം അക്രമങ്ങള്‍ക്കെതിരെ ക്രിയാത്മക ചുവടുവെപ്പുകള്‍ അനിവാര്യമാണെന്ന് കരുതുന്നു. പ്രയോജനകരമായതും കുഴപ്പങ്ങളെ ചെറുക്കുന്ന തരത്തിലുള്ളതുമായിരിക്കണം പ്രതിരോധങ്ങളെന്നും അദ്ദേഹം കൂട്ടിച്ചേര്‍ത്തു.