വയനാട് കൂട്ടായ്​മയുടെ സേവന പ്രവര്‍ത്തനങ്ങള്‍ക്ക് തുടക്കമായി

മനാമ: പ്രളയം ദുരിതം തീര്‍ത്ത വയനാട്ടില്‍ വീടുകള്‍ നിര്‍മ്മിച്ചു നല്‍കുമെന്ന പ്രഖ്യാപനത്തോടെ വയനാട് കൂട്ടായ്​മ ബഹ്റൈ​​​െൻറ സേവന പ്രവര്‍ത്തനങ്ങള്‍ക്ക് ബഹ്റൈനില്‍ തുടക്കമായി. മനാമ പാകിസ്ഥാന്‍ ക്ലബ്ബില്‍ നടന്ന നൗഷാദ് ബാഖവിയുടെ മുഹറം പ്രഭാഷണ പരിപാടിയോടനുബന്ധിച്ച് നടന്ന ചടങ്ങിലാണ് കൂട്ടായ്​മയുടെ ഔദ്യോഗിക പ്രഖ്യാപനവും ചാരിറ്റിപ്രവര്‍ത്തനങ്ങളുടെ ഉദ്ഘാടനവും നടന്നത്. പ്രഥമ ഘട്ട സഹായമായി വയനാട്ടില്‍ പ്രളയ ദുരന്തത്തില്‍ വീടുകള്‍ നഷ്​ടപ്പെട്ട രണ്ട്​ കുടുംബങ്ങള്‍ക്ക് ഓരോ വീടുകള്‍ നിര്‍മ്മിച്ച് നല്‍കുമെന്ന് ചടങ്ങില്‍ പ്രഖ്യാപിച്ചു.

കൂടാതെ, നാട്ടില്‍ വൈവിധ്യമാര്‍ന്ന ജീവകാരുണ്യ പ്രവര്‍ത്തനങ്ങള്‍ കൂടിയാലോചിച്ച് നടപ്പിലാക്കാനും ബഹ്റൈനിലെയും നാട്ടിലെയും പ്രവാസികള്‍ക്ക് അനിവാര്യമായ സഹായ പദ്ധതികള്‍ എത്തിക്കാനുമുള്ള പദ്ധതികളും ഭാവിയില്‍ ആസൂത്രണം ചെയ്യും. കൂട്ടായ്​മയുടെ വിപുലീകരണത്തിന് ബഹ്റൈനിലുള്ള വയനാട്ടുകാരെല്ലാം ഭാരവാഹികളുമായി 00973-33719890, 39171948, 34352895 എന്നീ നമ്പറുകളില്‍ ബന്ധപ്പെടണമെന്നും ഭാരവാഹികള്‍ അഭ്യർഥിച്ചു. കൂട്ടായ്​മയുടെ ലോഗോ പ്രകാശനം നൗഷാദ് ബാഖവിയും ഫഖ്റുദ്ദീന്‍ കോയ തങ്ങളും ​േചർന്ന്​ ഉദ്ഘാടനം ചെയ്​തു. ഇബ്രാഹീം മുറിച്ചാണ്ടി, നവാസ് പാലേരി, അസീസ് വയനാട്, ഗഫൂര്‍ കൈപ്പമംഗലം, എസ്.എം അബ്ദുല്‍ വാഹിദ് എന്നിവര്‍ സംസാരിച്ചു. വയനാട് കൂട്ടായ്​മ ബഹ്റൈന്‍ പ്രസിഡൻറ്​ പി.ടി. ഹുസൈന്‍ മുട്ടില്‍ അധ്യക്ഷത വഹിച്ചു. ജന.സെക്രട്ടറി എം.കെ. ഹുസൈന്‍ മക്കിയാട് സ്വാഗതവും ട്രഷറര്‍ മുഹ്സിന്‍ പന്തിപ്പൊയില്‍ നന്ദിയും പറഞ്ഞു.