മികച്ച ദേശസാത്​കൃത സ്​ഥാപനത്തിനുള്ള അവാർഡ്​ ബഹ്​റൈൻ ‘ട്രാ’ക്ക്​

മനാമ: ബഹ്​റൈൻ ടെലികമ്മ്യൂണിക്കേഷൻ റെഗുലേറ്ററി ​അതോറിറ്റി (ട്രാ) ജി.സി.സിയിലെ മികച്ച ദേശസാത്​കൃത സ്​ഥാപനമായി  തെരഞ്ഞെടുക്കപ്പെട്ടു. അബൂദബിയിൽ നടന്ന ജി.സി.സി തല എച്ച്​. ആർ ഉച്ചകോടിയിലാണ്​ ഇൗ അംഗീകാരം ലഭിച്ചത്​. പരിപാടിയിൽ സർക്കാർ തലത്തിൽ പ്രവർത്തിക്കുന്ന 250 ഒാളം എച്ച്​.ആർ വിദഗ്​ധർ പ​െങ്കടുത്തു. ജി.സി.സി പൊതുമേഖല സ്​ഥാപനങ്ങളിൽ മനുഷ്യവിഭവശേഷിയുടെ കാര്യക്ഷമത വർധിപ്പിക്കാനുള്ള ചർച്ചകൾ നടക്കുന്ന പ്രധാന സമ്മേളനങ്ങളിൽ ഒന്നാണിത്​. പുതുമയാർന്ന പദ്ധതികൾ അവതരിപ്പിച്ചതും സ്വദേശികളെ നിയമിച്ചതും ടെലികോം വ്യവസായ രംഗത്തെ പുരോഗതികൾക്കനുസൃതമായി നയങ്ങൾ ആസൂത്രണം ചെയ്​തതുമാണ്​ ബഹ്​റൈൻ ട്രാക്ക്​ അംഗീകാരം ലഭിക്കാനുള്ള കാരണമായത്​. അവാർഡ്​ ലഭിച്ചത്​ ഏറെ സന്തോഷമുള്ള കാര്യമാണെന്നും ഇത്​ കഴിവുള്ള സ്വദേശി പൗരൻമാർക്ക്​ കൂടുതൽ അംഗീകാരങ്ങളും അവസരങ്ങളും നൽകാനുള്ള ട്രായുടെ നിശ്​ചയ ദാർഡ്യത്തിന്​ കരുത്തു പകരുമെന്നും ട്രാ ഡയർക്​ടർ ഫൈസൽ അൽ ജലാഹ്​മ അവാർഡ്​ സ്വീകരിച്ച്​ പറഞ്ഞു. ഗൾഫിലുടനീളമുള്ള മികച്ച സ്​ഥാപനങ്ങളെ മറികടന്നാണ്​ ട്രാക്ക്​ അംഗീകാരം ലഭിച്ചത്. ബഹ്​റൈൻ ദേശീയ നേതൃത്വത്തി​​െൻറ നയം നടപ്പാക്കുകയാണ്​ ട്രാ ചെയ്​തിട്ടുള്ളത്​.സ്വദേശികളുടെ കഴിവിലും മികവിലും തികഞ്ഞ വിശ്വാസമാണ്​ ഭരണനേതൃത്വത്തിനുള്ളതെന്നും അദ്ദേഹം കൂട്ടിച്ചേർത്തു. ഹ്യൂമൺ റിസോഴ്​സ്​ രംഗത്തെ വിദഗ്​ധ പാനൽ ആണ്​ അവാർഡിന്​ അർഹരായവരെ തെരഞ്ഞെടുക്കുന്നത്​. 2012 മുതൽ തൊഴിൽ നയത്തിലുണ്ടായ മാറ്റം ട്രായിലെ സ്വദേശി പ്രാതിനിധ്യത്തെ കരുത്തുറ്റതാക്കിയിട്ടുണ്ട്. 2012ൽ ട്രായിൽ 70ശതമാനവും വിദേശികളായിരുന്നു.നിർണായക സ്​ഥാനങ്ങളെല്ലാം വഹിച്ചത്​ പ്രവാസികളായിരുന്നു. എന്നാൽ ഇന്ന്​ 80 ശതമാനം തസ്​തികകളിലും സ്വദേശികളാണ്​.